លោក Ruben Amorim បានអះអាងថាគាត់កំពុងព្យាយាមឱ្យអស់ពីសមត្ថភាពដើម្បីធ្វើអោយកីឡាករ Alejandro Garnacho អាចស័ក្តិសមទៅនឹងទម្រង់លេងរបស់ Manchester United ខណៈកំពុងមានព័ត៌មានចចាមអារ៉ាមក្នុងការផ្ទេរទៅកាន់ក្លឹប Chelsea។
ថ្លែងទៅកាន់អ្នកសារព័ត៌មាន អ្នកចាត់ការសញ្ជាតិព័រទុយហ្គាល់បាននិយាយនៅពេលគេសង្កត់ទៅលើអនាគតរបស់ Garnacho ថា៖ «វាគ្មានអ្នកណាដឹងទេ អ្វីៗអាចកើតឡើង។ គាត់កំពុងកែលម្អគ្រប់ផ្នែកនៃការប្រកួត៖ ការយល់ដឹង ពេលណាត្រូវការពារ។ ខ្ញុំកំពុងព្យាយាមស្វែងរកទីតាំងល្អបំផុតសម្រាប់គាត់ នៅថ្ងៃនេះគាត់លេងបើកចំហបន្តិច មិនមែនខាងក្នុងទេ។ យើងត្រូវការកីឡាករដែលអាចលេងមួយទល់នឹងមួយ»៕
