ខ្សែការពារស្លាបឆ្វេងកីឡាករ Malacia មិនមានវត្តមានសម្រាប់ក្លឹប Man Utd ក្នុងរដូវកាលនេះទេ ជាមួយនឹងការបង្ហាញខ្លួនចុងក្រោយរបស់គាត់សម្រាប់ក្លឹបកាលពី ១០ខែមុនក្នុងការប្រកួតឈ្នះ ២-១ លើក្រុម Fulham នៅថ្ងៃចុងក្រោយនៃយុទ្ធនាការក្នុងរដូវកាល ២០២២-២៣ ហើយវាត្រូវបានគេរាយការណ៍ថាគាត់ កំពុងតស៊ូជាមួយនឹងបញ្ហាសុភាពទាំងផ្លូវកាយ និងផ្លូវចិត្តរបស់គាត់។
ក្លឹបបិសាចក្រហមមិនទាន់ផ្តល់ការពន្យល់ពេញលេញណាមួយសម្រាប់ការអវត្តមានរបស់កីឡាកររូបនេះនោះទេ ប៉ុន្តែបើយោងតាមការចេញផ្សាយរបស់ Fabrizio Romano បានអោយដឹងថាស្ថានភាពរបស់ Malacia គឺជាការលំបាកមួយ។
អវត្តមានរបស់កីឡាករ Malacia បានថ្វើអោយលោក Erik ten Hag បានជួបនៅបញ្ហាខ្វះខាតនៅជម្រើសតំបន់ការពារស្លាបឆ្វេង ហើយកីឡាករ Luke Shaw ក៏ត្រូវអវត្តមានដោយសារបញ្ហារបួសសម្រាប់រដូវកាលដែលនៅសល់។ ប្រភពដដែលបានអោយដឹងថាក្លឹប Man Utd អាចនឹងសម្លឹងរកមើលនៅការចុះហត្ថលេខាយកខ្សែការពារឆ្វេងថ្មី ប្រសិនជាស្ថានភាពរបស់កីឡាករ Malacia នៅតែជាបញ្ហា។
លោក Romano អ្នកសារព័ត៌មានកីឡាម្នាក់បាននិយាយនៅ The United Stand ថា៖ «វាជាពេលវេលាដ៏ស្មុគស្មាញមួយសម្រាប់ក្មេងប្រុសម្នាក់នេះ។ គាត់ពិតជាមានការតស៊ូ។ ខ្ញុំគិតថាក្លឹប Manchester United នឹងត្រូវធ្វើឱ្យមានភាពច្បាស់លាស់ខ្លះនៅក្នុងសប្តាហ៍ក្រោយ ឬច្រើនខែទៀត ដើម្បីបញ្ជាក់អំពីអ្វីដែលកំពុងកើតឡើងចំពោះ Malacia»។
លោក Ten Hag បានបញ្ជាក់នាពេលថ្មីៗនេះថាកីឡាករសញ្ជាតិហូឡង់រូបនេះបានត្រលប់មកហ្វឹកហាត់វិញ ហើយកីឡាករវ័យ ២៤ឆ្នាំរូបនេះត្រូវធ្វើការ «ប្រយុទ្ធ» ដើម្បីអាចទទួលបានតំណែងរបស់គាត់នៅក្នុងជម្រើស ១១នាក់ ប៉ុន្តែមិនរំពឹងទុកថាគាត់អាចនឹងត្រលប់មកប្រកួតប្រជែងក្នុងរដូវកាលនេះទេ។ ក្លឹប Man Utd នឹងត្រូវជួបជាមួយ Brentford សម្រាប់ការប្រកួតបន្ទាប់នៅ Premier League នាថ្ងៃទី២០ ខែមីនា៕
