លោក Erik ten Hag អ្នកចាត់ការទូទៅរបស់ក្រុម Manchester United ជឿជាក់ថា Casemiro គឺជាជម្រើសដ៏ល្អឥតខ្ចោះក្នុងនាមជាប្រធានក្រុម នៅពេលអវត្តមានកីឡាករ Bruno Fernandes ។ Fernandes ត្រូវបានក្លាយជាកីឡាករបម្រុងជាមួយ Marcus Rashford សម្រាប់ការប្រកួត Carabao Cup ។
នេះមានន័យថា Ten Hag ត្រូវជ្រើសយកកីឡាករផ្សេងជាប្រធានក្រុម ហើយគាត់បានសម្រេចចិត្តជ្រើសរើស Casemiro ប៉ុន្មានថ្ងៃបន្ទាប់ពី Roy Keane បានអះអាងថា Fernandes គួរតែត្រូវបានដកចេញពីតួនាទី។ នៅពេលមានសំណួរអំពីមូលហេតុដែលគាត់ជ្រើសរើស Casemiro ហើយមិនមែនជា Harry Maguire ដែលជាប្រធានក្រុមចាស់លោក Ten Hag បានពន្យល់ថា៖ «គាត់តែងតែបង្ហាញពីភាពជាអ្នកដឹកនាំរបស់គាត់នៅរាល់ការហ្វឹកហាត់ និងរាល់ការប្រកួត។ គាត់គឺជាជម្រើសដ៏ល្អបំផុត»។
Ten Hag ក៏បានពន្យល់ផងដែរពីការដែលមិនដាក់ Fernandes ឬ Rashford ។ លោកបានលើកឡើងថា៖ «វាចាំបាច់ទេ ដោយសារពួកគេមានទម្រង់លេងល្អ ប៉ុន្តែយើងត្រូវអោយពួកគេមានអារម្មណ៍ល្អដែរ ហើយមួយទៀតយើងចង់ផ្តល់ឱកាសដល់កីឡាករផ្សេងទៀត ព្រោះពួកគេបង្ហាញវត្តមានបានយ៉ាងល្អនៅគ្រប់វគ្គហ្វឹកហាត់»។
សម្រាប់បញ្ហារបស់ Casemiro ត្រូវបានពិន័យកាតលឿងបន្ទាប់ពីបានប៉ទង្គិចជាមួយ Joe Willock នៅនាទីទី 19 ដែលធ្វើឱ្យគាត់មានភាពតឹងតែងសម្រាប់ការប្រកួតដែលនៅសល់។ ទន្ទឹមនឹងនេះដែរ ការជជែកដេញដោលពីប្រធានក្រុមនៅ Man United ត្រូវបានគេនិយាយយ៉ាងទូលំទូលាយក្នុងរយៈពេលប៉ុន្មានថ្ងៃថ្មីៗនេះ បន្ទាប់ពី Keane បានស្តីបន្ទោស Fernandes ក្រោយពីការប្រកួត Manchester Derby។ អតីតខ្សែបម្រើរបស់បិសាចក្រហមរូបនេះបានប្រាប់ Sky Sports ថា៖ «រឿងមួយដែលខ្ញុំនឹងធ្វើបន្ទាប់ពីថ្ងៃនេះ គឺខ្ញុំប្រាកដជាដកតំណែងប្រធានក្រុមចេញពី Fernandes 100 ភាគរយ។ ខ្ញុំគិតថាគាត់ជាកីឡាករដែលមានទេពកោសល្យ ប៉ុន្តែអ្វីដែលខ្ញុំបានឃើញថ្ងៃនេះ វាពិតជាមិនអាចទទួលយកបានទេ»៕
