ខ្សែបម្រើ Rodri របស់ Manchester City បានអំពាវនាវឱ្យអាជ្ញាធរបាល់ទាត់ អោយមានការគ្រប់គ្រងការផ្ទេរកីឡាករពីបាល់ទាត់អឺរ៉ុបទៅកាន់ Saudi Pro League ។ កីឡាករវ័យ 38 ឆ្នាំ Cristiano Ronaldo គឺជាកីឡាករដំបូងគេដែលបានផ្លាស់ទៅប្រទេសអារ៉ាប៊ីសាអូឌីត នៅពេលដែលគាត់បានចុះហត្ថលេខាជាមួយ Al Nassr នៅចុងខែធ្នូ ឆ្នាំ 2022 ។ បន្ទាប់មក Karim Benzema និង N’Golo Kante បានចូលរួមជាមួយ Al Ittihad ក្នុងខែមិថុនា ។
Rodri បាននិយាយពេលបំពេញកាតព្វកិច្ចការប្រកួតអន្តរជាតិជាមួយអេស្ប៉ាញថា៖ «កីឡាករបាល់ទាត់អឺរ៉ុបកំពុងស្ថិតក្នុងស្ថានភាពមិនល្អ។ កីឡាករដែលសម្រេចចិត្តចេញទៅលីគផ្សេងក្រៅពីអឺរ៉ុប យើងអាចយល់បានថាព្រោះអ្វី ។ ជាក់ស្តែង ដោយសារតែចំនួនទឹកប្រាក់ដែលពួកគេផ្តល់ជូន ខ្ញុំចាត់ទុកថានេះជាបញ្ហាមួយ»។
«យើងជាជនជាតិអឺរ៉ុប ខ្ញុំស្រមៃថា យើងអាចទទួលបានការគ្រប់គ្រងការផ្ទេរកីឡាករដែលមានទេពកោសល្យអោយមានការប្រកួតប្រជែងនៅអឺរ៉ុប ដែលដំបូងឡើយ ខ្ញុំគិតថានេះគ្រាន់តែជាកន្លែងបញ្ចប់អាជីពរបស់កីឡាករជើងចាស់តែប៉ុណ្ណោះ។ ប៉ុន្តែយើងឃើញថាមិនមែនទេ សូម្បីតែយុវជនក៏ជ្រើសរើសទៅទីនោះដែរ»។
ការអត្ថាធិប្បាយរបស់ Rodri ត្រូវបានគេចាត់ទុកជាការរក្សាទីផ្សារដែលផ្តល់កម្រិតនៃការចំណាយរបស់ Premier League នៅរដូវក្តៅនេះ។ ក្លឹប Saudi Pro League បានចំណាយប្រាក់សរុបចំនួន 875,4 លានផោនក្នុងអំឡុងទីផ្សារដោះដូរកីឡាករដែលទើបតែបិទថ្មីៗនេះ៕
