យោងតាមកាសែត Daily Mail បានអោយដឹងថាកីឡាករ N’Golo Kante បានបន្តកុងត្រាថ្មីនៅ Chelsea ខណៈខ្សែបម្រើសញ្ជាតិបារាំងរូបនេះ មានការចាប់អារម្មណ៍ពី Barcelona និង Arsenal ក៏ដោយ។
កិច្ចសន្យារបស់កីឡាករវ័យ 31 ឆ្នាំនឹងផុតកំណត់នៅចុងបញ្ចប់នៃរដូវកាលនេះ ដែលបណ្តាលឱ្យមានការចាប់អារម្មណ៍ពីក្លឹបកំពូលៗនៅអឺរ៉ុបរួមមាន Barcelona និង Arsenal ។
ខ្សែបម្រើការពាររូបនេះ បានចុះហត្ថលេខាលើកិច្ចសន្យារយៈពេលពីរឆ្នាំបន្ថែមរហូតដល់ឆ្នាំ 2025 ដោយ Chelsea មានជម្រើសក្នុងការបន្តកុងត្រារយៈពេលមួយឆ្នាំទៀត។
Kante គឺជាផ្នែកមួយដ៏សំខាន់នៃក្រុមដំបូងរបស់ Chelsea ចាប់តាំងពីផ្លាស់មកពី Leicester ក្នុងតម្លៃ 32 លានផោនក្នុងឆ្នាំ 2016 ។
នៅពេលសួរថាតើគាត់ចង់បន្តនៅ Chelsea ឬអត់? Kante បានប្រាប់ Sky Sports ថា៖ «ប្រាកដណាស់។ វាជារឿងដ៏រំភើបមួយសម្រាប់ខ្ញុំ»។
ចំពោះរបួសរបស់គាត់ Kante បានបន្ថែមថា៖ «ខ្ញុំបានត្រលប់មកវិញជាមួយភាពរឹងមាំ។ នៅពេលនេះខ្ញុំមានអារម្មណ៍ល្អ សង្ឃឹមថាវានៅតែដូចពីមុន។ ប៉ុន្មានសប្តាហ៍ចុងក្រោយនេះដែលខ្ញុំបានលេងបាល់ ខ្ញុំបានចូលហ្វឹកហាត់វិញហើយ។ ខ្ញុំសង្ឃឹមថាខ្ញុំនឹងបន្តសម្រាប់រដូវកាលដែលនៅសល់ ហើយសង្ឃឹមថាខ្ញុំអាចជួយក្រុមបាន ហើយយើងរីករាយជាមួយបាល់ទាត់ម្តងទៀត រីករាយនឹងការឈ្នះម្តងទៀត និងរីករាយជាមួយក្ដីសង្ឃឹមក្នុងការទទួលបានជោគជ័យបន្ថែមទៀត»។
គួររំលឹកឡើងវិញផងដែរថា N’Golo Kante បានជួយក្រុមតោខៀវឱ្យឈ្នះពានរង្វាន់ Premier League និងពានរង្វាន់ Champions League ក្នុងរយ:ពេលប្រាំពីរឆ្នាំរបស់គាត់ជាមួយ Stamford Bridge រហូតមកដល់ពេលនេះ៕
