ខ្សែបម្រើ Bruno Fernandes របស់ Manchester United បានសារភាពថា ការសុំទោសចំពោះអ្នកគាំទ្រគឺ “មិនគ្រប់គ្រាន់ទេ” បន្ទាប់ពីក្រុមរបស់គាត់ធ្វើមិនបានល្អជាមួយក្រុម Liverpool ។
Fernandes និងមិត្តរួមក្រុមរបស់គាត់បានរងបរាជ័យយ៉ាងអាម៉ាស់ក្នុងលទ្ធផល 4-0 ទល់នឹងគូប្រជែងរបស់ពួកគេកាលពីយប់មិញនៅឯកីឡដ្ឋាន Anfield ក្នុងក្របខ័ណ្ឌ Premier League ។
ថ្លែងទៅកាន់ Sky Sports បន្ទាប់ពីការប្រកួត Fernandes បាននិយាយថា៖ “វាជាលទ្ធផលដ៏អាក្រក់ជាថ្មីម្តងទៀត។ ជាក់ស្តែង ពួកយើងបានសុំទោសអ្នកគាំទ្រ។ វានឹងមិនគ្រប់គ្រាន់ទេ ប៉ុន្តែជាការពិត វាជាអ្វីដែលយើងអាចធ្វើបាននៅពេលនេះ”។
ខ្សែបម្រើសញ្ជាតិព័រទុយហ្គាល់រូបនេះបានបន្តថា៖ “អ្នកគាំទ្រមិនសប្បាយចិត្តជាមួយនឹងទម្រង់លេងរបស់ពួកយើង ពួកគេសមនឹងទទួលបានច្រើនជាងនេះពីយើង។ ពួកគេនៅបន្តគាំទ្រយើងរហូតដល់អាជ្ញាកណ្តាលផ្លុំកញ្ចែបញ្ចប់ការប្រកួត”។
នៅពេលសួរអំពីអារម្មណ៍នៅក្នុងបន្ទប់ផ្លាស់សំលៀកបំពាក់របស់បិសាចក្រហម បន្ទាប់ពីការបរាជ័យរបស់ពួកគេជាមួយនឹងក្រុម Liverpool Fernandes បាននិយាយថា៖
“យើងត្រូវតែនិយាយ ប៉ុន្តែនិយាយនៅក្នុងបន្ទប់ផ្លាស់សំលៀកបំពាក់។ យើងដឹងថាមិនមានអ្វីច្រើនទេដែលយើងអាចធ្វើបាន ឥឡូវនេះការប្រកួតបានបញ្ចប់។ យើងត្រូវមើលខ្លួនឯង យើងត្រូវមើលពីខាងក្នុង មើលពីលើរហូតដល់ក្រោម ហើយស្វែងយល់ថាអ្វីទៅជាកំខុស”៕
