PSG កំពុងប្រឈមនឹងបញ្ជាទម្រង់បច្ចុប្បន្នមានការធ្លាក់ចុះ ហើយអ្នកចាត់ការបច្ចុប្បន្នលោក Mauricio Pochettino អាចនឹងត្រូវបណ្តេញចេញនៅរដូវក្តៅនេះ។ យោងតាមសារព័ត៌មានឲ្យដឹងថាក្រុមយក្សបារាំង បានសម្លឹងឃើញបេក្ខភាពមួយចំនួនរួចហើយ ដើម្បីជំនួសកន្លែងរបស់អ្នកចាត់ការសញ្ជាតិអាហ្សង់ទីន ហើយអ្នកចាត់ការនៅក្របខ័ណ្ឌ Premier League ពីរនាក់ត្រូវបានបញ្ចូលក្នុងបញ្ជីនេះ។
វាជាការធ្លាក់ចុះយ៉ាងខ្លាំងសម្រាប់ PSG នៅពេលដែលក្លឹបនេះបរាជ័យក្នុងការឈានទៅជុំបន្ទាប់នៃ UEFA Champions League។ ថ្មីៗនេះក្រុម Paris Saint-Germain បានចាញ់ការប្រកួតជុំទី ១៦ របស់ពួកគេជាមួយនឹងក្រុម Real Madrid បើទោះបីជាបានរក្សាការនាំមុខ ១-០ លើក្រុម Los Blancos ក្នុងជើងទីមួយក៏ដោយ។
Madrid ធ្វើជាម្ចាស់ផ្ទះទទួលភ្ញៀវ PSG សម្រាប់ការប្រកួតជើងទី ២ នៅ Santiago Bernabeu ហើយម្ចាស់ជើងឯកអឺរ៉ុប ១៣ សម័យបានឈ្នះការប្រកួតជើងទី២ ក្នុងលទ្ធផល ៣-១ ។ លទ្ធផលនេះគឺគ្រប់គ្រាន់សម្រាប់ Madrid ដើម្បីទម្លាក់ Paris ចេញពី Champions League ដោយពិន្ទុសរុបទាំង២ជើងគឺ ៣-២។
ការធ្លាក់ចេញរបស់ PSG ពី Champions League បានបង្កឱ្យមានភាពចលាចលយ៉ាងខ្លាំងនៅក្នុងក្លឹប។ របាយការណ៍ជាច្រើនបានចង្អុលបង្ហាញថា Paris Saint-Germain កំពុងរៀបចំផែនការសម្រាប់ការផ្លាស់ប្តូរអ្នកចាត់របស់ក្លឹប។ នាយកផ្នែកកីឡាលោក Leonardo និងគ្រូបង្វឹកបច្ចុប្បន្នលោក Pochettino អាចនឹងចាកចេញពីក្លឹបនៅរដូវក្តៅនេះ ដែលជាផ្នែកនៃការផ្លាស់ប្តូរ។
យោងតាមរបាយការណ៍ថ្មីៗនេះបានឲ្យដឹងថា បញ្ជីឈ្មោះបេក្ខភាពទាំងអស់ដែល PSG បានសម្លឹងឃើញដើម្បីជំនួសតំណែងលោក Pochettino នៅរដូវកាលក្រោយមានដូចជា៖ Antonio Conte, Mikel Arteta, Zinedine Zidane, Thiago Motta, Massimiliano Alegri, Erik ten Hag, Diego Simeone និង Simone Inzaghi ៕
