Edouard Mendy បានអះអាងថាទំនាក់ទំនងរបស់គាត់ជាមួយ Kepa Arrizabalaga គឺនៅតែល្អ ទោះបីជាពួកគេកំពុងប្រជែងសម្រាប់អ្នកចាំទីដៃទី១នៅ Chelsea ក៏ដោយ។
អ្នកការពារសំណាស់ទីទាំងពីរធ្វើបានល្អដូចគ្នាក្នុងរដូវកាលនេះ ហើយបានធ្វើឱ្យអ្នកចាត់ការ Thomas Tuchel ឈឺក្បាលក្នុងការជ្រើសរើស។
Mendy នៅតែត្រូវបានគេចាត់ទុកថាជាអ្នកចាំទីជម្រើសដំបូងនៅ Stamford Bridge ។ ទោះយ៉ាងណាក៏ដោយខណៈពេលដែលគាត់ជាប់ភារៈកិច្ចនៅក្នុងពានអាហ្វ្រិកAFCON កាលពីខែមករា Kepa គឺជាអ្នករាប់រងការងារនៅ Chelsea។
អ្នកចាំទីសញ្ជាតិអេស្បាញទទួលបានការចាប់អារម្មណ៍ខ្លាំង ហើយមានការអំពាវនាវមួយចំនួនឱ្យគាត់បន្តក្នុងជម្រើសដៃទី១។ ទោះជាយ៉ាងណា Mendy បានប្រជែងយកតំណែងនេះមកវិញភ្លាមៗ ពេលគាត់ត្រឡប់មកពីបំពេញកាតព្វកិច្ចអន្តរជាតិ។
ពេលនិយាយក្នុងសន្និសីទសារព័ត៌មានមុនការប្រកួត UEFA Champions League ទល់នឹង Lille អ្នកចាំទី Mendy ត្រូវបានគេសួរអំពីស្ថានភាពរបស់គាត់ជាមួយ Kepa ។
អ្នកចាំទីជម្រើសជាតិសេណេហ្គាល់ បានបង្ហើបថា អ្នកទាំងពីរស្ថិតក្នុងលក្ខខណ្ឌល្អ ហើយមិនមានបញ្ហានៅលើ ឬក្រៅទីលាននោះទេ។ គាត់បាននិយាយថា៖
«ទំនាក់ទំនងរបស់ខ្ញុំជាមួយ Kepa គឺល្អតាំងពីខ្ញុំមកទីនេះ។ យើងមានទំនាក់ទំនងល្អទាំងក្នុង និងក្រៅទីលាន។ គាត់ធ្វើបានល្អណាស់ពេលខ្ញុំជាប់ភារៈកិច្ចពានអាហ្វ្រិក Afcon។ នៅពេលអ្នកលេងឱ្យ Chelsea អ្នកមានការប្រកួតប្រជែងគ្រប់មុខតំណែង ដូច្នេះអ្នកត្រូវតែលេងឲ្យអស់ពីសមត្ថភាពរបស់អ្នក ហើយលេងក្នុងកម្រិតខ្ពស់បំផុតរបស់អ្នក ដើម្បីជាប់ជម្រើស ១១នាក់ដំបូង»៕
