ក្រុម Paris Saint-Germain បានបញ្ជាក់ថាខ្សែប្រយុទ្ធឆ្នើម Neymar Jr នឹងមិនមានវត្តមាននៅក្នុងការប្រកួតក្របខ័ណ្ឌ Champions League របស់ពួកគេជាមួយក្រុម RB Leipzig របស់ក្របខ័ណ្ឌ Bundesliga បន្ទាប់ពីរងរបួសក្រលៀន។
ក្លឹបយក្សបារាំងបានបញ្ជាក់ថា៖ «Neymar Jr មានការឈឺចាប់នៅត្រង់ក្រលៀនរបស់គាត់ ចាប់តាំងពីត្រលប់មកពីបំពេញកាតព្វកិច្ចអន្តរជាតិ ហើយនឹងត្រូវទទួលការព្យាបាលបន្ថែមទៀតនៅប៉ុន្មានថ្ងៃខាងមុខនេះ មុនពេលវិលត្រឡប់មកហ្វឹកហាត់វិញ»។
Neymar បានវិលត្រឡប់មក PSG វិញកាលពីថ្ងៃសៅរ៍ បន្ទាប់ពីបានបង្ហាញមុខឱ្យក្រុមជម្រើសជាតិប្រេស៊ីលអំឡុងការប្រកួតជម្រុះ FIFA World Cup 2022 របស់ពួកគេ។ យោងតាមសារព័ត៌មានបារាំង Le Parisien បានអោយដឹងថាខ្សែប្រយុទ្ធវ័យ ២៩ ឆ្នាំរូបនេះបានចូលរួមហ្វឹកហាត់នៅថ្ងៃច័ន្ទមុនការប្រកួត Champions League របស់ PSG ទល់នឹង RB Leipzig ។
បញ្ជាក់ផងដែរថា អវត្តមានគួរឱ្យកត់សម្គាល់ផ្សេងទៀតសម្រាប់ PSG នៅមុនការប្រកួត Champions League រួមមាន Sergio Ramos ដែលបន្តហ្វឹកហាត់ជាលក្ខណៈបុគ្គល និង Leandro Paredes ដែលត្រូវអវត្តមានដោយសាររបួសភ្លៅ៕
