របាយការណ៍ថ្មីៗបានបង្ហាញថាខ្សែការពាររបស់ក្រុម Juventus កីឡាករ Matthijs de Ligt អាចនឹងចាកចេញពីទីក្រុង Turin ដោយ Chelsea និង Barcelona គឺជាគោលដៅដ៏មានសក្តានុពល។
ខ្សែការពារហូឡង់រូបនេះបានចូលរួមជាមួយក្រុមសេះបង្កង់ ក្នុងឆ្នាំ ២០១៩ ពីក្លិប Ajax ហើយបានក្លាយជាផ្នែកមួយដែលមិនអាចខ្វះបាននៃបញ្ជីឈ្មោះរបស់ពួកគេចាប់តាំងពីពេលនោះមក ហើយគាត់បានឈ្នះពានរង្វាន់ Serie A ក្នុងរដូវកាលដំបូងរបស់គាត់ជាមួយក្រុម Juventus ។
ដោយសារតែទម្រង់លេងដ៏ល្អរបស់គាត់ ទើបធ្វើឲ្យលោក Mino Raiola ដែលជាភ្នាក់ងារល្បីឈ្មោះម្នាក់ បានធ្វើការទាក់ទងជាមួយក្លឹប ដើម្បីនាំកីឡាកររូបនេះចេញពីទឹកដី Turin នៅចុងបញ្ចប់នៃរដូវកាលបច្ចុប្បន្ន។ សម្រាប់ក្លឹបដែលចាប់អរម្មណ៍លើ Matthijs de Ligt រួមមាន Chelsea, Manchester City និង Barcelona ។
ក្លឹបសេះបង្កង់ បានជួបការលំបាកកាលពីរដូវកាលមុន និងបានបាត់បង់ពានរង្វាន់ Serie A ទៅឲ្យក្រុម Inter Milan ។ ក្រុម Juventus ទើបតែវិលត្រឡប់មករកជ័យជំនះវិញខ្លះ ចាប់តាំងពីផ្តើមរដូវកាលមិនសូវល្អ បន្ទាប់ពីការចាកចេញរបស់ Cristiano Ronaldo៕
