កីឡាករ Thiago Silva បានផ្តល់ការគាំទ្រផ្នែកផ្លូវចិត្តចំពោះ Neymar ដែលជាមិត្តភក្តិជិតស្និទ្ធរបស់គាត់ និងមិត្តរួមក្រុមប្រេស៊ីល ដែលកាលពីដើមសប្តាហ៍នេះ បានសារភាពថា គាត់មិនដឹងថាតើគាត់មាន“ កម្លាំងចិត្តក្នុងការដោះស្រាយបញ្ហាបាល់ទាត់” យូរប៉ុណ្ណាទេ។
Silva បានលេងជាមួយ Neymar សម្រាប់ Selecao អស់រយៈពេលមួយទសវត្សហើយ ថែមទាំងបានរួមក្រុមជាមួយខ្សែប្រយុទ្ធរូបនេះនៅ Paris Saint-Germain ផងដែរ។ ក្នុងនាមជាខ្សែការពារកណ្តាលដ៏ល្បីលើពិភពលោក Silva បាននិយាយថា គាត់អាចដឹងច្បាស់ពីអារម្មណ៍ដែល Neymar កំពុងមាន និងទទួលស្គាល់ថា វាពិតជាឈឺចាប់ណាស់ ដែលត្រូវបានគេដាក់ឈ្មោះជាសាធារណៈថា ជាក្មេងរំអ៊ួយ។
ទោះជាយ៉ាងណា ខ្សែការពាររូបនេះ ប្តេជ្ញាផ្តល់ការគាំទ្រជាសាធារណៈដល់ជនរួមជាតិរបស់គាត់ ដោយសង្ឃឹមថា នឹងជួយគាត់ឱ្យមានស្មារតីបាល់ទាត់ឡើងវិញ។
គួរបញ្ជាក់ថា សុខភាពផ្លូវចិត្តបានក្លាយជាការសន្ទនាដ៏សំខាន់មួយ នៅក្នុងពិភពបាល់ទាត់ក្នុងរយៈពេលប៉ុន្មានឆ្នាំចុងក្រោយនេះ ដោយសារកីឡាករបានចាប់ផ្តើមបើកចំហរពីអារម្មណ៍ និងការលំបាកខាងផ្លូវចិត្ត៕
