ក្រុម Real Madrid ជាក្រុមមួយដែលកំពុងស្ថិតនៅក្នុងភាពល្អប្រសើរសម្រាប់បេសកកម្មក្នុងយុទ្ធនាការបច្ចុប្បន្ន។ លោក Carlo Ancelotti បាននាំក្រុម Los Blancos ឡើងដល់កំពូលតារាងរួចទៅហើយបន្ទាប់ពីការប្រកួត ៨ លើកដំបូងនៃរដូវកាលនេះ។
យោងតាមគេហទំព័រ The Hard Tackle បានអោយដឹងថាក្រុម Real Madrid បានត្រៀមខ្លួនរួចជាស្រេចក្នុងការដោះលែងកីឡាករ Eden Hazard ។ បញ្ហារបស់កីឡាករសញ្ជាតិបែលហ្ស៊ិក គឺរបួសរ៉ាំរ៉ៃចាប់តាំងពីផ្លាស់ទៅ Santiago Bernabeu ហើយឥឡូវនេះវាហាក់ដូចជា Los Blancos បានត្រៀមខ្លួនរួចជាស្រេច ដើម្បីកាត់បន្ថយការខាតបង់ថវិការរបស់ពួកគេ។
Hazard បានចូលរួមជាមួយ Real Madrid ពី Chelsea នៅរដូវក្តៅឆ្នាំ ២០១៩ ដើម្បីជំនួស Cristiano Ronaldo។ បញ្ហារបួសបានយាយី Hazard ធ្វើឲ្យកីឡាកររូបនេះបង្ហាញខ្លួនបានតិចបំផុតឲ្យ Los Blancos កីឡាករសញ្ជាតិបែលហ្ស៊ិករូបនេះរកបានតែ ៥គ្រាប់ប៉ុណ្ណោះ និងបញ្ជូនបាល់ឲ្យមិត្តរួមក្រុមបញ្ចប់ទីបាន ៩ដងពីការបង្ហាញខ្លួនចំនួន ៥១លើកនៅក្នុងការប្រកួតទាំងអស់សម្រាប់ក្រុមអធិរាជស។
Los Blancos មានគម្រោងបន្ថែម Kylian Mbappe និង Erling Haaland ទៅក្នុងបញ្ជីឈ្មោះរបស់ពួកគេនៅឆ្នាំក្រោយ មានន័យថា Hazard នឹងលើសតម្រូវការ។ ក្រុមយក្សនៅ La Liga ចង់បញ្ចប់ការស្នាក់នៅរបស់គាត់នៅ Santiago Bernabeu នៅក្នុងទីផ្សាដោះដូរកីឡាករខែមករាខាងមុខនេះ៕
