ថ្លែងក្នុងវែបសាយផ្ទាល់ ប្រធានក្លិបអ្នកមានបុណ្យ FC Barcelona លោក Joan Laporta បានចេញមុខមកបញ្ជាក់អំពីអនាគតរបស់កំពូលខ្សែប្រយុទ្ធអាហ្សង់ទីន Lionel Messi នៅទឹកដី Camp Nou។
ពិតណាស់ ខណៈពេលនេះ Messi នៅជាកីឡាករដែលគ្មានក្លិប បន្ទាប់ពីកុងត្រារបស់គេនៅ Barcelona បានអស់សុពលភាព តាំងពីថ្ងៃទី៣០ ខែមិថុនា មកម្ល៉េះ ប៉ុន្តែរបាយការណ៍មួយចំនួនបានទម្លាយឲ្យដឹងថា កីឡាករសញ្ជាតិអាហ្សង់ទីនវ័យ ៣៤ឆ្នាំរូបនេះ យល់ព្រមបន្តកិច្ចសន្យាថ្មីហើយ នៅឡើយតែរង់ចាំការប្រកាសជាផ្លូវការតែប៉ុណ្ណោះ។
Laporta និយាយថា “ពួកយើងកំពុងស្ថិតនៅក្នុងដំណាក់កាល ដើម្បីធ្វើយ៉ាងណាឲ្យ Messi បន្តលេងនៅ Barcelona។ គាត់ចង់បន្តលេងនៅទីនេះ ហើយពួកយើងត្រូវតែធ្វើវាឲ្យបាន។ អ្វីៗគ្រប់បែបយ៉ាងកំពុងដំណើរការបានយ៉ាងរលូន”៕
