ភ្នំពេញ៖ សមត្ថកិច្ចជំនាញ នៃមន្ទីរប្រឆាំងគ្រឿងញៀន បានបង្ក្រាបបទល្មើសគ្រឿងញៀនឆ្លងដែន ២ករណីផ្សេងគ្នា ឃាត់ខ្លួនជនសង្ស័យ៥នាក់ និងរឹបអូសគ្រឿងញៀនជិត ៤គីឡូក្រាម ។
+ករណី ទី ១៖ កាលពីថ្ងៃ២៦ ខែឧសភា ឆ្នាំ២០២០ សមត្ថកិច្ចយោធាការពារ ព្រំដែនវៀតណាម ខេត្តឡុងអាង បានបង្ក្រាបករណី ជួញដូរគ្រឿងញៀន និងអាវុធនៅចំណុចទល់មុខ ច្រកអន្តរជាតិ ប៊ិញហៀប- ព្រៃវល្លិ៍ (ខេត្តស្វាយរៀង – ឡុងអាង) ។ លទ្ធផល ឃាត់មនុស្ស១នាក់ ឈ្មោះត្រិន ទួនខាញ់ ភេទប្រុសជនជាតិវៀតណាម ។ ដកហូត: គ្រឿងញៀនប្រភេទទម្ងន់២០.៨គ.ក្រ និងអាវុធខ្លី៣ដើម ។
បន្ទាប់ពីបានទទួលព័ត៌មាន ពីភាគីវៀតណាមរួចមក នៅថ្ងៃទី២៦ ខែឧសភា ឆ្នាំ២០២០ កម្លាំងជំនាញនៃមន្ទីរប្រឆាំងគ្រឿងញៀន (ក១០) ដឹកនាំដោយលោកឧត្តមសេនីយ៍ទោ សារី បុត្រសត្យា នាយករងមន្ទីរសហការជាមួយ កម្លាំង ជំនាញ នៃស្នងការដ្ឋាននគរបាល ខេត្តស្វាយរៀង និងកម្លាំងជំនាញនៃនាយកដ្ឋានស៊ើបការណ៍ ខាងក្រៅនិងបច្ចេកទេស នៃអគ្គស្នងការដ្ឋាននគរបាលជាតិ ក្រោមការសម្របសម្រួល របស់លោក ហេង ផេង ព្រះរាជអាជ្ញារងអមសាលាដំបូង រាជធានីភ្នំពេញបាន បើកប្រតិបត្តិការស្រាវជ្រាវ ស៊ើបអង្កេតបន្ត នៅគោលដៅ ផ្ទះលេខ៨០ ផ្លូវលេខ១០ បុរីប៉េងហួត ភូមិព្រែកលាប សង្កាត់ជ្រោយចង្វារ ខណ្ឌជ្រោយចង្វារ ដោយទទួលបានលទ្ធផលដូចខាងក្រោម ៖
ជនសង្ស័យទាំង២នាក់ មានឈ្មោះ ឯក សារិទ្ធ ភេទប្រុសអាយុ ៣៤ឆ្នាំជនជាតិខ្មែរ (អ្នកដឹកជញ្ជូនគ្រឿងញៀន ទៅវៀតណាម) និងឈ្មោះ សួន គីមបូរ ភេទប្រុស អាយុ២៣ឆ្នាំ ជនជាតិខ្មែរ ( អ្នកជួញដូរ ) ។
វត្ថុតាងចាប់យកមាន៖ សារធាតុញៀនសរុបទម្ងន់២៤៦០.១៤ក្រាម រួមមាន ៖ 1)ហេរ៉ូ អ៊ីន (Heroin) ទម្ងន់២១៣៥.៥៧ ក្រាម, 2)មេតំហ្វេតាមីន (ICE) ទម្ងន់៤.៦៨ ក្រាម,3)អ៊ិ ចស្តាស៊ី (MDMA) ទម្ងន់១៥៦.៥២ ក្រាម ,4)កេតាមីន(Ketamine) ទម្ងន់១០.៩១ក្រាម , 5) នីមេតាហ្ស៊េបាម ទម្ងន់២៧៥.១៨ ក្រាម ,6) សារធាតុ គីមី ផ្សំផ្សេងទៀតទម្ងន់ ២៨៧.២២ ក្រាម ,រថយន្ត២គ្រឿង, ម៉ូតូ៣គ្រឿង ,អាវុធខ្លី១ដើម និង អាវុធ វែង ១ ដើម ។
+ករណី ទី២ ៖ កាលពីថ្ងៃ២៧ ដល់២៨ ខែឧសភា ឆ្នាំ ២០២០ កម្លាំង ជំនាញ នៃ មន្ទីរ ប្រឆាំង គ្រឿងញៀន ( ក ១) ដឹកនាំ ដោយ លោកឧត្តមសេនីយ៍ទោ អ៊ិន សុង នាយករងមន្ទីរសហការជាមួយសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ ក្រោមការសម្របសម្រួល របស់លោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ បានបើកប្រតិបត្តិការស្រាវជ្រាវស៊ើបអង្កេតនិង បង្ក្រាបបទល្មើសគ្រឿងញៀន ឆ្លងដែន ពី កម្ពុជាទៅតៃវ៉ាន់ នៅ៣គោលដៅផ្សេងៗពីគ្នា ទី ១.ស្ថិតនៅចំណុចក្នុងភូមិគង្គាផុស១ សង្កាត់ទួលសង្កែ ខណ្ឌឬស្សី កែវ ទី២.នៅចំណុចមុខសណ្ឋាគារ កាំបូឌីយ៉ាណា វិថីព្រះស៊ីសុវត្ថ សង្កាត់ស្រះចក ខណ្ឌដូនពេញ និងទី៣.នៅ បន្ទប់ជួលលេខ១២២២ ជាន់ទី១២ នៃខូនដូ Diamond One ក្នុងកោះពេជ្រ សង្កាត់ទន្លេបាសាក់ ខណ្ឌចំការមន ដោយទទួលបាន លទ្ធផលដូចខាងក្រោម ៖
ឃាត់ខ្លួនជនសង្ស័យចំនួន៣នាក់រួមមាន ៖ ១-ឈ្មោះ ហាន រីណា ភេទប្រុស អាយុ៣០ ឆ្នាំ ជនជាតិខ្មែរ , ២-ឈ្មោះ EGOR SERGIENKO អាយុ៣៥ឆ្នាំ ភេទប្រុសជនជាតិរុស្សី និង៣- ឈ្មោះ LU CHAO FENG ភេទប្រុស ជនជាតិ ចិន (តៃវ៉ាន់ )អាយុ ៤៤ឆ្នាំ ។
ក្នុងនោះដកហូត សារធាតុញៀន សរុបទម្ងន់ ១,៣៥៧.៨៥ក្រាម រួមមាន៖ហេរ៉ូអ៊ី ន(Heroin)ទម្ងន់ ១២២៨.០៨ ក្រាម មេតំហ្វេតាមីន(ICE) ទម្ងន់៥.៥០ក្រាម ,ទូរស័ព្ទដៃ៤គ្រឿង ,រថយន្ត២គ្រឿងម៉ូតូ១គ្រឿង ,ជញ្ជីងថ្លឹង២ គ្រឿងនិងសម្ភារៈវេចខ្ចប់ មួយចំនួន ។
បច្ចុប្បន្នជនសង្ស័យ ព្រមទាំងវត្ថុតាងខាងលើ សមត្ថកិច្ចជំនាញ បានកសាងសំណុំរឿងបញ្ជូនទៅ សាលាដំបូង រាជធានីភ្នំពេញ តាមនីតិវិធី ៕
