ភ្នំពេញ៖លោកគួច ចំរើន អភិបាលខេត្តព្រះសីហនុ បានជំរុញឱ្យមន្ទីរសាធារណការ និងដឹកជញ្ជូនខេត្ត ក៍ដូចជាមន្ទីរដែនដីត្រូវសហការគ្នា រៀបចំបោះបង្គោលកំណត់និយាមការទីតាំងអូរ ប្រឡាយចំនួន៥ខ្សែ ដើម្បីងាយស្រួលបើកការ ដ្ឋានស្ដារឡើងវិញនៅថ្ងៃទី៩ ខែធ្នូ ឆ្នាំ២០១៩ ខាងមុខនេះ។
គម្រោងការងារស្តារអូរ ប្រឡាយទាំង ៥ខ្សែ មានប្រវែង ២៦,៥៩៧គីឡូម៉ែត្រ ក្នុងក្រុងព្រះសីហនុ ក្នុងនោះរួមមាន៖ អូរប្រឡាយអូរឈើទាល មានអូរតូច ៥ផ្សេងទៀត ប្រវែងសរុប ១៦.៦៣០ម៉ែត្រ , អូរ ប្រឡាយ អូរអេម៉ារីយូ មានប្រវែង ១.៩០០ម៉ែត្រ , អូរ ប្រឡាយ អូរសំអាត ប្រវែង ៣.៧៧៥ម៉ែត្រ , អូរ ប្រឡាយស្ពានឆេះ ប្រវែង ១.១៧០ម៉ែត្រ , អូរ ប្រឡាយ អណ្តូងអ៊ុនតាក់ ប្រវែង ៣.១១៦ម៉ែត្រ ដើម្បីធ្វើការស្តាររំដោះយកចំណីអូរប្រឡាយមកវិញ។នេះបើយោងតាមបណ្ដាញទំនាក់ទំនងសង្គមហ្វេសប៊ុករបស់រដ្ឋបាលខេត្តព្រះសីហនុ។
ក្នុងកិច្ចប្រជុំ ស្តីពីការងារស្តារអូរ ប្រឡាយទាំង ៥ខ្សែ ក្នុងក្រុងព្រះសីហនុលោកគួច ចំរើនបានថ្លែងថា “ខ្ញុំសូមជំរុញឱ្យមន្ទីរសាធារណការ និងដឹកជញ្ជូន ក៍ដូចជាមន្ទីរដែនដី ត្រូវសហការគ្នា រៀបចំបោះបង្គោលកំណត់និយាមការទីតាំងអូរ ប្រឡាយទាំង ៥ខ្សែ ដើម្បីឱ្យក្រុមការងារចុះការស្តារអូរ ប្រឡាយ មានភាពងាយស្រួល “។
លោកបន្តថា ពិសេសអាជ្ញាធរក្រុង ត្រូវចូលរួមសហការ ចុះបាញ់ថ្នាំ និងអប់រំឱ្យប្រជាពលរដ្ឋរុះរើសំណង់ទាំងឡាយណា ដែលប៉ះពាល់ការងារស្តារអូរប្រឡាយ ដើម្បីឲ្យងាយស្រួលដល់ក្រុមការងារដាក់គ្រឿងចក្រចុះកាយ ដើម្បីរំដោះជំនន់ទឹកភ្លៀង នៅរដូវវស្សាខាងមុខនេះ ។
លោកអភិបាលខេត្ត បញ្ជាក់ថារដ្ឋបាលខេត្ត កំពុងមានការមមាញឹក ក្នុងការស្ថាបនាផ្លូវទាំង ៣៤ខ្សែ។ ដូច្នេះប្រព័ន្ធអូរ ប្រឡាយនៅក្នុងក្រុងព្រះសីហនុ ក៍ត្រូវធ្វើការស្តារឡើងវិញជាមួយគ្នា ដើម្បីបញ្ចៀសនូវជំនន់ទឹកភ្លៀង កុំឱ្យជន់លិចក្នុងរដូវវស្សា នៅឆ្នាំ២០២០ខាងមុខ៕
