ភ្នំពេញ៖ លោកវរសេនីយ៍ទោ ញាន សារឿន ស្នងការរងនគរបាលខេត្តព្រះសីហនុទទួលផែនសណ្តាប់ធ្នាប់ បានឲ្យដឹងថាក្រុមការងារចំរុះរៀបចំសណ្តាប់ធ្នាប់បានប្រើវិធានការក្តៅគគុកចំពោះការដ្ឋានសំណង់ដែលមិនគោរពតាមសេចក្តីជូនដំណឹងរបស់សាលាខេត្តដោយស្ទូចយកសម្ភារៈសំណង់ របស់ជនបរទេស ដែលដាក់លើចិញ្ចើមផ្លូវ ចំនួន១៨ការដ្ឋាន។នេះបើយោងតាមអគ្គស្នងការនគរបាលជាតិ។
លោកញាន សារឿន បានបញ្ជាក់ថា ក្រុមការងារបានស្ទូចយកសំភារៈសំណង់ចំនួន១៨ការដ្ឋាន អប់រំឲ្យធ្វើកិច្ចសន្យាចំនួន៦ការដ្ឋាន ដែលកំណត់ឲ្យត្រឹមម៉ោង៧និង៣០នាទីព្រឹក ថ្ងៃទី២៣ ខែធ្នូត្រូវលើកចេញឲ្យផុត បើមិនព្រមអនុវត្តទេ ក្រុមការងារនឹងស្ទូចយកទាំងអស់។
ក្នុងនោះដែរការដ្ឋានសំណង់មួយកន្លែងនៅសង្កាត់លេខ៤ ត្រូវបានបិទមិនឲ្យសាងសង់។ សំភារៈដែលស្ទូចយក មានដែក ឥដ្ឋ ឈើ ម៉ាស៊ីនកាត់ដែកមួយគ្រឿង និងម៉ាស៊ីនពត់ដែកចំនួន២គ្រឿង បានដឹកជញ្ជូនមករក្សាទុកនៅក្នុងទីលានកំពង់ផែស្វយ័តក្រុងព្រះសីហនុ។ ការដ្ឋានទាំង១៨ទីតាំងនោះ ស្ថិតក្នុងសង្កាត់លេខ៣ ចំនួន៦កន្លែង និង សង្កាត់លេខ៤ ចំនួន១២កន្លែង ៕
