លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និងសហការីបានចូលរួមកិច្ចប្រជុំជាមួយ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តី ក្រសួងរៀបចំដែនដី នគរូបនីយកម្ម និងសំណង់ និងសហការី កាលពីថ្ងៃទី២៤ ខែមីនា ឆ្នាំ២០២៥ នៅទីស្តីការក្រសួងរៀបចំដែនដី នគរូបនីយកម្ម និងសំណង់។
លទ្ធផលនៃជំនួបបានឱ្យដឹងជាសង្ខេបថា លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជាបានឯកភាពក្នុងការធ្វើកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងកម្រិតសមស្របណាមួយដើម្បីជំរុញឱ្យសេដ្ឋកិច្ចជាតិដំណើរការល្អ។
ប្រភពដដែលបន្តថា ក្នុងកិច្ចប្រជុំឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីតែងតែបានលើកឡើងថា យើងទាំងអស់គ្នាត្រូវរៀបចំផ្ទះសម្បែងរបស់យើងឱ្យបានរៀបរយ ហើយមិនមានពេលវេលាណាដែលអំណោយផលដូចពេលនេះទេ ក្នុងការរៀបចំផ្ទះសម្បែងរបស់យើងឱ្យបានត្រឹមត្រូវ និងមានរបៀបរៀបរយ។
ឯកឧត្តមឧបនាយករដ្ឋមន្ត្រី ក៏បាននង្ហាញនូវការកត់សម្គាល់ថា ជាទូទៅប្រាក់ដុល្លារ និងប្រាក់រៀល អាចដំណើរការនៅក្នុងលំហូរសេដ្ឋកិច្ចកម្ពុជានាពេលបច្ចុប្បន្ន ដែលនេះគឺជារឿងដ៏ល្អមួយសម្រាប់កម្ពុជាដែលបានដើរលើផ្លូវដ៏ត្រឹមត្រូវតាំងពីឆ្នាំ១៩៧៩ មក ។ ការសម្រួលអត្រាការប្រាក់នឹងជួយបន្ធូរដល់បំណុលឯកជន ដែលអាចឈានទៅបន្ធូរដល់បំណុលសាធារណៈផងដែរ។
ជាសំណើដល់ធនាគារជាតិនៃកម្ពុជា ឯកឧត្តមឧបនាយករដ្ឋមន្ត្រី សាយ សំអាល់ លើកឡើងថា តើធនាគារជាតិនៃកម្ពុជាអាចមានការឯកភាពសហការជាមួយក្រសួងរៀបចំដែនដីកម្រិតណាក្នុងវិស័យដីធ្លី ដើម្បីប្រែក្លាយដីឱ្យទៅជាធនាគារដី ដែលអាចជួយជំរុញកំណើនសេដ្ឋកិច្ចជាតិបានយ៉ាងល្អ។
ក្នុងកិច្ចប្រជុំដដែលនេះ លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា បានឱ្យដឹងអំពីស្ថានភាពវិស័យធនាគារ និងទំនាក់ទំនងជាមួយវិស័យសំណង់ និងអចលនទ្រព្យនៅកម្ពុជា ក្នុងនោះលោកជំទាវបានផ្តាំផ្ញើដល់អ្នកដែលទទួលបានបណ្ណកម្មសិទ្ធិដីធ្លីពីរាជរដ្ឋាភិបាលហើយនោះត្រូវថែរក្សាទុកជាកេរមរតក និងសូមកុំយកទៅលក់ ឬដាក់បញ្ចាំនៅធនាគារភ្លាមៗ ហើយត្រូវប្រើប្រាស់បណ្ណកម្មសិទ្ធិនេះប្រកបដោយការទទួលខុសត្រូវ។
លោកជំទាវបញ្ជាក់ថា ទំនាក់ទំនងរវាងអចលនទ្រព្យ និងធនាគារ គឺមានភាពស្អិតរមួត តាមរយៈការដាក់ទ្រព្យបញ្ចាំដើម្បីបានប្រាក់កម្ចី ហើយការឡើង ឬចុះនៃតម្លៃអចលនទ្រព្យក៏មានផលប៉ះពាល់ដល់ធនាគារដែរ ។ ជាមួយនេះលោកជំទាវបណ្ឌិតក៏បានឯកភាពក្នុងការធ្វើកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងកម្រិតសមស្របណាមួយដើម្បីជំរុញឱ្យសេដ្ឋកិច្ចជាតិដំណើរការល្អផងដែរ ។
ក្នុងជំនួបនេះ ថ្នាក់ដឹកនាំស្ថាប័នទាំងពីរបានពិភាក្សាអំពីស្ថានភាពវិស័យធនាគារ និងទំនាក់ទំនងជាមួយវិស័យសំណង់និងអចលនទ្រព្យ និងការប្រើប្រាស់បច្ចេកវិទ្យាប្លុកឆេនតាមរយៈប្រព័ន្ធបាគង ដើម្បីសម្រួលដល់ការផ្ទេរបណ្ណកម្មសិទ្ធិ ក៏ដូចជាការដាក់បន្ទុក និងការដោះបន្ទុកអចលនទ្រព្យក្នុងវិស័យធនាគារ ក្នុងគោលបំណងសម្រួលដល់ការគ្រប់គ្រង និងការប្រើប្រាស់បណ្ណអចលនទ្រព្យឱ្យមានប្រសិទ្ធភាព និងតម្លាភាព ស្របតាមគោលនយោបាយរបស់រាជរដ្ឋាភិបាលក្នុងការអភិវឌ្ឍសេដ្ឋកិច្ចនិងសង្គមឌីជីថល។
ដើម្បីពង្រឹងកិច្ចសហការខាងលើនេះអង្គប្រជុំក៏បានឯកភាពក្នុងការរៀបចំក្រុមការងារសម្រាប់សិក្សាលើការធ្វើសន្ធានកម្មប្រព័ន្ធបាគងជាមួយប្រព័ន្ធគ្រប់គ្រងទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ និងសិក្សាបន្ថែមលើក្របខ័ណ្ឌច្បាប់និងបទប្បញ្ញត្តិពាក់ព័ន្ធនានា៕
