ជាមោទកភាពជាតិ យុវជនកម្ពុជាមួយក្រុមចំនួន៣រូប ដែលបានដាក់ឈ្មោះក្រុមថា SpecSpark បានរួមគ្នាបង្កើតគម្រោងរ៉ូបូតសម្លាប់សត្វល្អិតប្រើប្រាស់បច្ចេកវិទ្យា បញ្ញាសិប្បនិម្មិត ឬ AI បានជាប់ចំណាត់ថ្នាក់លេខ១ ពី “Grand Prize Award” ក្នុងការប្រកួតលំដាប់តំបន់អាស៊ីប៉ាស៊ីហ្វិកលើផ្នែក innovation track AI នៅក្នុងកម្មវិធី Huawei ICT Competition APAC Regional Finals 2024-2025 ក្នុងទីក្រុងកូឡាឡាំពួរ ប្រទេសម៉ាឡេស៊ី កាលពីពេលថ្មីៗនេះ។
ក្រុមជ័យលាភីទាំង៣រូប សុទ្ធតែជាក្រុមនិស្សិតដេប៉ាតឺម៉ង់ទេពកោសល្យ ព័ត៌មានវិទ្យា និងទំនាក់ទំនង នៃវិទ្យាស្ថានបច្ចេកវិទ្យាកម្ពុជា រួមមាន កញ្ញា វង់ ពេជ្រចរណៃ, កញ្ញា ហេង កល្យាណ និងលោក ផល ចាន់ផាយុ។ យុវជនទាំង៣រូបនេះ បានផ្ដួចផ្ដើមគំនិតបង្កើតរ៉ូបូតសម្លាប់សត្វល្អិតប្រើប្រាស់ AI សម្រាប់ប្រើប្រាស់ក្នុងវិស័យកសិកម្ម។ ជាការកត់សម្គាល់ក្រុមនេះមាន យុវតី២រូប ខណៈយុវជនមានតែម្នាក់ប៉ុណ្ណោះ ។
ជាមួយនឹងជោគជ័យចំណាត់ថ្នាក់លេខ១ ពី“Grand Prize Award”កញ្ញា ហេង កល្យាណ និស្សិតឆ្នាំទី៤ ដេប៉ាតឺម៉ង់ទេពកោសល្យ ព័ត៌មានវិទ្យា និងទំនាក់ទំនង នៃវិទ្យាស្ថានបច្ចេកវិទ្យាកម្ពុជា និងជាសមាជិកក្រុម SpecSpark បានប្រាប់បណ្ដាញសារព័ត៌មានថា កត្តាដែលជំរុញឱ្យក្រុមរបស់ខ្លួនចូលរួមប្រកួតប្រជែងនៅក្នុងកម្មវិធី នេះព្រោះពួកគេចង់សាកល្បង និងបង្ហាញសមត្ថភាព ក៏ដូចជាដើម្បីទទួលបានបទពិសោធន៍បន្ថែមនៅក្នុងការប្រកួតផ្នែកនេះ។
កញ្ញាបន្តថា រ៉ូបូត ដែលក្រុមរបស់ខ្លួនបានបង្កើតឡើងមានឈ្មោះថា Pestibot គឺជារ៉ូបូតធ្វើការនៅក្នុងវិស័យកសិកម្ម ដំណើរការដោយស្វ័យប្រវត្តិក្នុងការកំណត់មុខសញ្ញាសត្វល្អិត និងបាញ់ថ្នាំសម្លាប់សត្វល្អិត។ កញ្ញាអធិប្បាយថា សម្រាប់ផ្នែក AI គឺសត្វល្អិតម៉ូឌែលនៃសត្វល្អិត (AI Model Insect) ដែលភ្ជាប់ទៅលើរ៉ូបូត។ក្រុមបានបង្វឹក AI ឱ្យស្គាល់ប្រភេទសត្វល្អិតចង្រៃរួចជាស្រេចក្នុងការបាញ់ថ្នាំសម្លាប់សត្វល្អិតទាំងនោះ។
ទាក់ទងនឹងជ័យលាភីរបស់ក្រុមរ៉ូបូត Pestibot ជាប់ចំណាត់ថ្នាក់លេខ១ ក្នុងតំបន់ កញ្ញា ហេង កល្យាណ បញ្ជាក់ថា គឺដោយសារការយល់ដឹងទៅលើការជ្រើសយកឧបករណ៍បច្ចេកវិទ្យាមកប្រើប្រាស់ ជាពិសេស ឧបករណ៍ផ្នែកបញ្ញាសិប្បនិម្មិត (AI) សម្រាប់បង្កើតជាគម្រោងនវានុវត្តន៍មួយ ដែលនាំមកនូវជាអត្ថប្រយោជន៍ជូនដល់សង្គម ដោយអាចចូលរួមដោះស្រាយបញ្ហាប្រឈមនៅក្នុងជីវភាពប្រចាំថ្ងៃរបស់ប្រជាពលរដ្ឋ បង្កើនប្រសិទ្ធភាពធនធាន និងលើកកម្ពស់ផលិតភាព សំដៅទៅរកនិរន្តរភាពសម្រាប់សង្គម។
កញ្ញា កល្យាណបន្ថែមថា ការប្រកួតលំដាប់តំបន់អាស៊ីប៉ាស៊ីហ្វិក លើផ្នែក innovation track AI នៅក្នុងកម្មវិធី Huawei ICT Competition APAC Regional Finals 2024-2025 ក្នុងទីក្រុង កូឡាឡាំពួរ ប្រទេសម៉ាឡេស៊ី ចំណុចសំខាន់មួយទៀត គឺក្រុមរបស់គេក៏មានការយល់ដឹងច្បាស់ និងគិតគូរពីបញ្ហាដែលបានលើកឡើងក្នុងគម្រោងឱ្យបានគ្រប់ជ្រុងជ្រោយ ដើម្បីផ្តល់ជាដំណោះស្រាយមួយដែលមានប្រសិទ្ធភាព។ លើសពីនេះ ការមានជំនាញទន់ក្នុងការធ្វើបទបង្ហាញពីគំនិតនវានុវត្តន៍ និងបង្ហាញបានយ៉ាងច្បាស់លាស់ពីសក្តានុពលរបស់វាក្នុងការជួយដោះស្រាយបញ្ហាសង្គម ក៏បានចូលរួមជាកត្តាសំខាន់មួយនៅក្នុងការប្រកួតនេះផងដែរ។
និស្សិតឆ្នាំទី៤ រូបនេះ បន្ថែមទៀតថា ការសហការពីសមាជិកក្រុមដែលមានភាពខ្លាំងផ្សេងៗគ្នា អាចជួយបំពេញបន្ថែមចំណុចខ្វះខាតគ្នាបាន ព្រមទាំងមានសាស្ត្រាចារ្យ លោកគ្រូ អ្នកគ្រូ ដែលបានផ្តល់ជាដំបូន្មានល្អៗ និងបានណែនាំពីចំណុចដែលគួរកែលំអផងដែរ។
មុននឹងទទួលជោគជ័យ ក្រុមយុវជនទៅពីប្រទេសកម្ពុជាក៏ជួបប្រទះនឹងបញ្ហាមួយចំនួនដែរ។ កញ្ញា ហេង កល្យាណ បានរៀបរាប់ថា នៅក្នុងការប្រកួតប្រជែងនេះ ក្រុមរបស់គេក៏បានជួបនូវបញ្ហាមួយចំនួនដូចជា តម្រូវការក្នុងការធ្វើការស្រាវជ្រាវជាច្រើនអំពីបញ្ហាដែលសង្គមកំពុងជួបប្រទះ ដើម្បីបង្កើតជានវានុវត្តន៍មួយ ដែលអាចក្លាយជាដំណោះស្រាយមួយយ៉ាងមានប្រសិទ្ធភាព។ ចំពោះការបញ្ចូលគ្នារវាងគ្រឿងបង្គុំកុំព្យូទ័រ (Hardware) និងកម្មវិធីកម្មវិធីកុំព្យូទ័រ (Software) ក៏ជាការប្រឈមរបស់ក្រុមដូចគ្នា ព្រោះពួកគេសុទ្ធតែមកពីជំនាញ IT ផ្ដោតតែនៅលើកម្មវិធីកម្មវិធីកុំព្យូទ័រ (Software)។ មួយវិញទៀត ពួកគេត្រូវធ្វើនវានុវត្តន៍នេះឱ្យលេចចេញជារូបរាង និងមានលទ្ធផលច្បាស់លាស់ ជាពិសេសទៅលើទិន្នន័យផ្សេងៗ ដើម្បីត្រៀមខ្លួនក្នុងការឆ្លើយសំណួរឱ្យបានល្អនៅក្នុងវគ្គសំណួរចម្លើយ។
មហិច្ឆតាមិនបញ្ចប់ត្រឹមនេះទេ ។ ក្រុម SpecSpark នឹងត្រូវទៅប្រកួតបន្តលំដាប់ថ្នាក់ពិភពលោកនៅប្រទេសចិន ដែលមានប្រទេសជាច្រើនពីតំបន់ផ្សេងៗទៀតចូលរួម។ ក្រុម SpecSpark តំណាងឱ្យកម្ពុជា មានការប្តេជ្ញាចិត្តថា នឹងកែលម្អនូវចំណុចខ្វះខាត និងពង្រឹងសមត្ថភាពបន្ថែម ដើម្បីទទួលបានជ័យជម្នះនៅក្នុងវគ្គផ្តាច់ព្រ័ត្រនាពេលខាងមុខ៕
