ព្រះសីហនុ៖ កាលពីពេលថ្មីៗនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានបង្ហាញពីក្ដីរំពឹងថា នៅឆ្នាំ២០២៥នេះ តំបន់ឆ្នេរកម្ពុជាដែលរួមមានខេត្តចំនួន៤ អាចទាក់ទាញភ្ញៀវទេសចរជាតិប្រមាណ ៨លាននាក់ និងទេសចរអន្តរជាតិ ៨០ម៉ឺននាក់ ខណៈដែលបណ្តាញហេដ្ឋារចនាសម្ព័ន្ធនានាត្រូវបានអភិវឌ្ឍន៍បន្ថែម រួមទាំងតំបន់កម្សាន្តថ្មីៗមួយចំនួនទៀតបានបង្កើតឡើង។
តើខេត្តតំបន់ឆ្នេរទាំងបួនមានខេត្តណាខ្លះ? មានសក្ដានុពលអ្វីខ្លះ?តំបន់ឆ្នេរនៃប្រទេសកម្ពុជាមាន៤ខេត្តបញ្ចូលគ្នា គឺខេត្តកោះកុង ខេត្តកំពត ខេត្តព្រះសីហនុ នឹងខេត្តកែប ។ ខេត្តទាំង៤នេះ មានទីតាំងជាប់និងសមុទ្រកម្ពុជា ដែលមានប្រវែង៤៤០គីឡូម៉ែត្រ ។ តំបន់ឆ្នេរប្រទេសកម្ពុជា ត្រូវបានកំណត់យកខេត្តព្រះសីហនុ ជាចំណុចកណ្តាល ដែលមានចំងាយ ២៦៣គីឡូម៉ែត្រ ពីរាធានីភ្នំពេញ។ ខេត្តទាំងបួននោះមានភោគទ្រព្យទេសចរណ៍ធម្មជាតិទាក់ទាញភ្ញៀវទេសចរសំខាន់ៗជាងគេ គឺ ឆ្នេរសមុទ្រខ្យល់អាកាសបរិសុទ្ធ ព្រៃភ្នំ ព្រៃកោងកាង ទឹកធ្លាក់ ជាដើម ។
ខេត្តចំនួន៤នៃតំបន់ឆ្នេរសមុទ្រកម្ពុជាបាននិងកំពុងបង្ហាញពីសក្ដានុពលនៃការទាក់ទាញអ្នកវិនិយោគទៅបណ្ដាក់ទុនបន្ថែមទៀត ស្របពេលរាជរដ្ឋាភិបាលក៏បានកំណត់យកខេត្តនៃតំបន់សមុទ្រជាគោលដៅវិនិយោគរបស់ខ្លួនផងដែរ ។ ក្នុងនោះ ខេត្តព្រះសីហនុ ត្រូវបានមើលឃើញថា មានភាពលេចធ្លោរ និងទទួលបានការវិនិយោគច្រើនជាងគេទៅហើយ។
ដោយផ្អែកលើសក្តានុពលនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានបញ្ជាក់ថា រាជរដ្ឋាភិបាល បាន និងកំពុងយកចិត្តទុកដាក់យ៉ាងខ្លាំងទៅលើការរៀបចំ និងអភិវឌ្ឍន៍បន្ថែមនូវបណ្តាញហេដ្ឋារចនាសម្ព័ន្ធនានារួមមាន ផ្លូវថ្នល់ តំបន់ឆ្នេរកម្សាន្ត កំពង់ផែទេសចរណ៍ជាពិសេសការតភ្ជាប់បណ្តាខេត្តនានាមកកាន់ខេត្តជាប់តំបន់ឆ្នេរដែលជាគោលដៅទេសចរណ៍ដ៏សំខាន់។ ជាមួយនឹងភាពល្អប្រសើរនៃបណ្តាញហេដ្ឋារចនាសម្ព័ន្ធទាំងនេះ ក្នុងឆ្នាំ២០២៥រំពឹងថា អាចទទួលបានទេសចរជាតិប្រមាណ ៨លាននាក់ ហើយអន្តរជាតិប្រមាណ ៨០ម៉ឺននាក់។ ដោយឡែកសម្រាប់តែខេត្តព្រះសីហនុ រំពឹងទទួលបានទេសចរជាតិ៤លាននាក់ និងអន្តរជាតិប្រមាណ ៤៥ម៉ឺននាក់។
វិស័យទេសចរណ៍កម្ពុជា គឺជាវិស័យអាទិភាពមួយដែលសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានប្រសិទ្ធនាមថា ជាមាសបៃតង និងបានរួមចំណែកអភិវឌ្ឍសង្គម សេដ្ឋកិច្ច គាំទ្រដល់ការអភិរក្សធនធានធម្មជាតិ វប្បធម៌ដ៏សម្បូរបែប ដែលធ្វើឱ្យប្រទេសកម្ពុជា រក្សាបានសុខសន្តិភាព ស្ថិរភាពនយោបាយល្អ បន្តអនុគ្រោះដល់ការវិនិយោគ និងការរីកចម្រើនក្នុងវិស័យទេសចរណ៍ គឺជាជន្ទល់សេដ្ឋកិច្ចមួយសំខាន់ និងបានចូលរួមចំណែកប្រមាណ៣ភាគរយនៃផលិតផលក្នុងស្រុកសរុប។ នេះជាការគូសរំលេចបន្ថែមរបស់ឯកឧត្តមរដ្ឋមន្រ្តីក្រសួងទេសចរណ៍។
ឯកឧត្តមរដ្ឋមន្ត្រីក៏បានលើកឡើងពីទស្សនៈវិស័យទេសចរណ៍ជាវិជ្ជមានរបស់ខេត្តព្រះសីហនុ និងអំពាវនាវឱ្យអង្គភាពខេត្តជាប់មាត់សមុទ្រ អាជ្ញាធរពាក់ព័ន្ធ និងប្រជាពលរដ្ឋបងប្អូនប្រជាពលរដ្ឋ ចាប់យកអត្ថប្រយោជន៍ឱ្យបានច្រើន និងប្រកបដោយនិរន្តរភាព ដោយមានការទទួលខុសត្រូវ ហើយអ្វីដែលសំខាន់គឺការចូលរួមក្នុងកិច្ចសហប្រតិបត្តិការពីគ្រប់ភាគីពាក់ព័ន្ធ ទាំងវិស័យរដ្ឋ និងឯកជន ទាំងថ្នាក់ជាតិ ក្រោមជាតិ និងកិច្ចសហប្រតិបត្តិការជាអន្តរជាតិផងដែរ។
ប្រាប់បណ្ដាញសារព័ត៌មានកាលពីពេលកន្លងទៅនេះដែរឯកឧត្តម ម៉ាង ស៊ីណេត អភិបាលខេត្តព្រះសីហនុ បានអះអាងថា តបទៅនឹងគោលបំណង និងផែនការរបស់រាជរដ្ឋាភិបាល រដ្ឋបាលខេត្តព្រះសីហនុបានយកចិត្តទុកដាក់យ៉ាងខ្លាំងទៅលើការរៀបចំសណ្តាប់ធ្នាប់ ការអភិវឌ្ឍន៍នៅតាមតំបន់ទេសចរណ៍ និងកម្សាន្តនាតំបន់ឆ្នេរ ជាពិសេសគឺសុខសុវត្ថិភាពចំពោះភ្ញៀវទេសចរ ក៏ដូចជាបណ្តាអ្នកធុរកិច្ចផងដែរ។
បន្ថែមពីលើពិធីបុណ្យជាតិ និងសកល ក៏ដូចជាថ្ងៃសម្រាកចុងសប្ដាហ៍ នៅក្រុងព្រះសីហនុ ក៏ដូចជាតាមតំបន់កម្សាន្តនានាក្នុងខេត្ត រដ្ឋបាលខេត្តតែងបង្កើតជាព្រឹត្តិការណ៍សប្បាយៗជាបន្តបន្ទាប់។ ជាក់ស្ដែង កាលពីអំឡុងចុងខែមករា ឆ្នាំ២០២៥កន្លងទៅនេះ រដ្ឋបាលខេត្តព្រះសីហនុ ក្រោមកិច្ចសហការពីសំណាក់ក្រសួងទេសចរណ៍ បានរៀបចំព្រឹត្តិការណ៍ពិព័រណ៍ទេសចរណ៍បានយ៉ាងជោគជ័យ។ តាមរយៈព្រឹត្តិការណ៍គឺមានគោលបំណង ៖ ១- បង្កើនការទាក់ទាញទេសចរឱ្យមកសម្រាកកម្សាន្តនៅខេត្តព្រះសីហនុកាន់តែច្រើន និងស្នាក់នៅយូរថ្ងៃ។ ២- ជំរុញការផ្សព្វផ្សាយផលិតផល និងសក្ការនុពលទេសចរណ៍។ ៣- ជំរុញការផ្សព្វផ្សាយ និងលើកកម្ពស់តម្លៃវប្បធម៌ជាតិខ្មែរ។ ៤- ពង្រឹងកិច្ចសហប្រតិបត្តិការអន្តរជាតិ ដើម្បីឱ្យវិស័យទេសចរណ៍ និងពាណិជ្ជកម្មកាន់តែមានការរីកចម្រើន។
បើតាមលោក ឡុង ឌីម៉ង់ អភិបាលរងខេត្តព្រះសីហនុ បានបញ្ជាក់កាលពីពេលថ្មីៗនេះថា «ជារៀងរាល់ឆ្នាំ ខេត្តព្រះសីហនុមិនដែលសល់កន្លែងផ្ទះនៅនោះទេ។ ទេសចរមួយចំនួន ដែលមកកម្សាន្តនៅខេត្តព្រះសីហនុ ថ្ងៃចូលឆ្នាំ ក៏មានការបោះតង់តាមឆ្នេរ និងតាមកោះផងដែរ។ បច្ចុប្បន្ន ខេត្តព្រះសីហនុ មានកន្លែងស្នាក់ជិតមួយម៉ឺនបន្ទប់»។
គប្បីជម្រាបជូនថា ខេត្តព្រះសីហនុមានសមិទ្ធផលជាច្រើន ដែលសម្រេចបាន ក្នុងនោះមានដូចជា ជ័យលាភីទីក្រុងស្អាត ជ័យលាភីទីក្រុងទេសចរណ៍គ្នានផ្សែងបារី ជ័យលាភីផ្ការំដួលបីទង ជ័យលាភីលេខ១ ចូលឆ្នាំសកលល្អជាងគេប្រចាំឆ្នាំ២០២៣ ជ័យលាភីបង្គន់សាធារណៈស្តង់ដាអាស៊ាន ស្បាម៉ាហ្សាស្តង់ដាអាស៊ាន និងសហគមន៍ទេសចរណ៍ស្តង់ដាអាស៊ាន៕
