ភ្នំពេញ៖ នៅយប់ថ្ងៃទី០២ ខែមករា ឆ្នាំ២០២៥ វេលាម៉ោង២៣:០០នាទី នៅគោលដៅត្រួតពិនិត្យជាតិស្រវឹង ខាងមុខធនាគារABA មហាវិថីព្រះមុនីវង្ស សង្កាត់បឹងត្របែក ខណ្ឌចំការមន បានធ្វើការត្រួតពិនិត្យអ្នកបើកបរម៉ូតូ០១គ្រឿង ម៉ាកហុងដា PCX ពណ៌ខ្មៅ ពាក់ផ្លាកលេខ ភ្នំពេញ1IL-6081 ដែលមានកម្រិតជាតិអាកុល0,29 mg/L។
បច្ចុប្បន្នម៉ូតូយកមករក្សាទុកនៅអធិការដ្ឋាននគរបាលខណ្ឌចំការមន ដើម្បីធ្វើការផាកពិន័យ ក្រោយមក ស្រាប់តែមានគណនីឈ្មោះ Srey Roth ដែលត្រូវជាម្តាយម្ចាស់ម៉ូតូPCX បានបង្ហោះលើបណ្តាញសង្គម តិក តុក(TikTok )បានចេញវីដេអូនិយាយទំលាក់កំហុសមកលើសមត្ថកិច្ចយើងថាអនុវត្តន៍ខុសច្បាប់ ដោយបានពិន័យ ២៥០,០០០រៀល ឱ្យ២០០,០០០រៀល មិនព្រមយក ហើយយកម៉ូតូទៅរក្សាទុកនៅខណ្ឌ។
ការផាកពិន័យយោងទៅតាម មាត្រា ៦(ថ្មី) មាត្រា ៧(ថ្មី) មាត្រា ១០ (ថ្មី) នៃអនុក្រឹត្យលេខ ៣៩ អនក្របក និងមាត្រា ៧៧ (ថ្មី) នៃច្បាប់ស្តីពី ចរាចរណ៍ផ្លូវគោក បានចែងថា អ្នកបើកបររថយន្ត ម៉ូតូ ម៉ូតូកងបី និងរ៉ឺម៉ក ដែលស្ថិតក្នុងស្ថានភាពស្រវឹង នឹងត្រូវទទួលទោសតាមច្បាប់ស្តីពី ចរាចរណ៍ផ្លូវគោក ដូចខាងក្រោម៖
ចំពោះអ្នកមានជាតិស្រវឹងក្នុងខ្លួន កម្រិតជាតិអាល់កុលចាប់ពី ០,២៥-០,៣៩
–សម្រាប់អ្នកម៉ូតូ ត្រូវផាកពិន័យចំនួន ២៥ម៉ឺនរៀល។
–សម្រាប់អ្នក រថយន្តធុនស្រាល ត្រូវផាកពិន័យចំនួន ៤០ម៉ឺនរៀល។
–សម្រាប់អ្នករថយន្តធុនធ្ងន់ ត្រូវផាកពិន័យចំនួន ៨០ម៉ឺនរៀល។
ដោយឡែកចំពោះអ្នកមានជាតិស្រវឹងក្នុងខ្លួន កម្រិតជាតិអាលកុលចាប់ពី ០,៤០ឡើងទៅ
–សម្រាប់អ្នកម៉ូតូ ត្រូវផាកពិន័យចំនួន ១លានរៀល។
–សម្រាប់អ្នករថយន្តធុនស្រាល ត្រូវផាកពិន័យចំនួន ២លានរៀល។
-សម្រាប់អ្នករថយន្តធុនធ្ងន់ ត្រូវផាកពិន័យចំនួន ៤លានរៀល៕
