ភ្នំពេញ៖ ការប្រកាសសង់ផ្សារបឹងឈូកនៅខេត្តបាត់ដំបង ជូនអាជីវករឡើងវិញ បន្ទាប់ពីឆេះ ហើយផ្តល់សិទ្ធិឱ្យអាជីវករកាន់កាប់តូបអស់មួយជីវិត ក្រោយសាងសង់ឡើងវិញនេះ បានធ្វើឡើង នាឱកាសដែលសម្ដេចបវរធិបតីអញ្ជើញសម្ពោធសមិទ្ធផលនានានៅតំបន់អភិវឌ្ឍន៍បឹងជង្រុកតេជោឈ្នះឈ្នះ ស្ថិតនៅភូមិបឹងជង្រុកតេជោឈ្នះឈ្នះ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ នាព្រឹកថ្ងៃទី២៩ ខែវិច្ឆិកា ឆ្នាំ២០២៤ ។
សម្ដេចនាយករដ្ឋមន្ត្រីបានមានប្រសាសន៍ថា ដោយសារមានការអំពាវនាវពីទុក្ខលំបាករបស់អាជីវករ ហើយដោយសារម្ចាស់ផ្សារបឹងឈូក ពុំមានលទ្ធភាពសាងសង់ផ្សារថ្មីបន្ទាប់ពីឆេះផងនោះ ទើបសម្រេចថា រដ្ឋនឹងយកផ្សារនេះពីវិស័យឯកជនវិញ ហើយវិនិយោគទៅលើគម្រោងសាងសង់ជាថ្មី។
ទន្ទឹមគ្នានេះ សម្ដេចបវរធិបតីបានបញ្ជាក់ថា បន្ទាប់ពីផ្សារបឹងឈូក ត្រូវបានសាងសង់ចប់សព្វគ្រប់ សម្ដេចនឹងប្រគល់សិទ្ធិជូនអាជីវករកាន់កាប់តូបអស់មួយជីវិត ដោយពុំតម្រូវឱ្យមានបង់ថ្លៃជួលប្រចាំខែទៀតនោះឡើយ ។
សម្តេចបវរធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលឈរនៅជាមួយប្រជាពលរដ្ឋ ហើយប្រឹងប្រែងដោះស្រាយបញ្ហាជូនពលរដ្ឋ មិនដូចអ្នកខ្លះញុះញង់ពលរដ្ឋបង្កើតបញ្ហា ហើយឡើងយន្តហោះរត់ចោលពលរដ្ឋបាត់នោះទេ ។
សូមរំលឹកថា ផ្សារបឹងឈូកស្ថិតនៅក្នុងសង្កាត់ស្វាយប៉ោ ក្រុងបាត់ដំបងមានកម្ពស់២ជាន់សង់អំពីថ្ម ដែលវិនិយោគដោយក្រុមហ៊ុនឯកជនមួយ ហើយបានកើតអគ្គិភ័យកាលពីយប់ថ្ងៃទី៣វិច្ចិកាឆ្នាំ២០២៤៕
