តាកែវ៖ ដោយអនុវត្តតាមបទបញ្ជាយ៉ាងម៉ឺងម៉ាត់របស់ លោកឧត្តមសេនីយ៍ទោ ស្នងការនគរបាល ខេត្តតាកែវ ដោយមានការសម្របសម្រួលពី ឯកឧត្តមព្រះរាជអាជ្ញា អមសាលាដំបូងខេត្តតាកែវ នៅថ្ងៃសៅរ ១៥កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២០ ខែកក្កដា ឆ្នាំ២០២៤ វេលាម៉ោង ១១និង៣០នាទី នៅចំណុចរោងចិញ្ចឹមទា របស់ឈ្មោះ ហ៊ឹម ហេន ស្ថិតក្នុងភូមិយាផ្អើ ឃុំព្រៃផ្តាំ ស្រុកអង្គរបូរី ខេត្តតាកែវ កើតមានករណីប៉ុនប៉ងអំពើលួច ០១ករណី ដែលបង្កឡើងដោយជនសង្ស័យ ០២នាក់ មានឈ្មោះដូចខាងក្រោម៖
១.ឈ្មោះ ផង់ ណាន ហៅសិដ្ធ ភេទប្រុស អាយុ ២៣ឆ្នាំ មុខរបរមិនពិតប្រាកដ ជាមុខសញ្ញាលួចសកម្ម មានទីលំនៅភូមិព្រែកគ្រួស ឃុំព្រែកអំបិល ស្រុកស្អាង ខេត្តកណ្តាល។
២.ឈ្មោះ ផង់ បញ្ញា ហៅពៅ ភេទប្រុស អាយុ ២២ឆ្នាំ មុខរបរមិនពិតប្រាកដ ជាមុខសញ្ញាលួចសកម្ម មានទីលំនៅភូមិព្រែកគ្រួស ឃុំព្រែកអំបិល ស្រុកស្អាង ខេត្តកណ្តាល។
ជនសង្ស័យទាំងពីរនាក់ខាងលើប្រើប្រាស់ មធ្យោបាយម៉ូតូ ០១គ្រឿង ម៉ាកC១២៥ ពណ៌ខ្មៅ សេរី២០១៧ ពាក់ផ្លាកលេខ ភ្នំពេញ 1GQ-6541 បានជិះឌុបគ្នាធ្វើសកម្មភាពចូលរោងចិញ្ចឹមទាប៉ុនប៉ងលួចទ្រព្យសម្បត្តិ របស់ជនរងគ្រោះឈ្មោះ ហ៊ឹម ហេន ភេទប្រុស អាយុ ២៤ឆ្នាំ មុខរបរកសិករ មានទីលំនៅភូមិ-ឃុំ កើតហេតុខាងលើ មិនបានសំរេច ត្រូវបានជនរងគ្រោះឃើញទាន់ ឃាត់ខ្លួនប្រើវិធីលួងលោមជនសង្ស័យទាំង០២នាក់ រួចរាយការណ៍មកសមត្ថកិច្ចចុះធ្វើការអន្តរាគមន៍ភ្លាមៗដល់ កន្លែងកើតហេតុ រួចឃាត់ខ្លួនជនសង្ស័យទាំង០២នាក់ យកមកកាន់អធិការដ្ឋាននគរបាលស្រុកអង្គរបូរី ដើម្បីធ្វើ ការសាកសួរនិងកសាងសំណុំរឿងចាត់ការតាមនិតិវិធី៕
