កំពត៖ នៅព្រឹកថ្ងៃចន្ទ ទី០១ ខែកក្កដា ឆ្នាំ២០២៤ គណៈប្រតិភូក្រសួងវប្បធម៌ និងវិចិត្រសិល្បៈ ដឹកនាំដោយលោកជំទាវ ឡងឌី សាន់ណារ៉ា តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញជាអធិតីក្នុងពិធីបញ្ចុះសពលោកព្រឹទ្ធាចារ្យកោសល្យវោហារ គង់ ណៃ មរតកមនុស្សរស់នៅគេហដ្ឋានសពស្ថិតក្នុងភូមិដូង ឃុំស្វាយទងខាងជើង ស្រុកកំពង់ត្រាច ខេត្តកំពត។
លោកព្រឹទ្ធាចារ្យកោសល្យវោហារ គង់ ណៃ មរតកមនុស្សរស់បានទទួលមរណភាពនៅថ្ងៃសុក្រ ទី២៨ ខែមិថុនា ឆ្នាំ២០២៤ វេលាម៉ោង ១២:៤០នាទីថ្ងៃត្រង់ ក្នុងជន្មាយុ ៨០ឆ្នាំ ដោយជរាពាធ។
សូមជម្រាបជូនផងដែរថា ក្រោយពីទទួលបានដំណឹងអំពីមរណភាពលោកព្រឹទ្ធាចារ្យ គង់ ណៃ ដែលជាមរតកមនុស្សរស់ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានចាត់ក្រុមការងារក្រសួងចុះទៅដល់គេហដ្ឋានសពលោកព្រឹទ្ធាចារ្យ ដេីម្បីជួយសម្របសម្រួលរៀបចំចាត់ចែងកម្មវិធីបុណ្យ រៀបចំតុបតែងខ្លោងទ្វាររោងបុណ្យ សន្និយាតម្កល់សព រៀបចំតុបតែងកន្លែងសម្រាប់ព្រះសង្ឃសូត្រមន្ត ដោយចំណាយថវិកាសរុបប្រមាណ ២០,០០០,០០០រៀល៕
ជាចុងក្រោយ យេីងខ្ញុំតាំងនាមឱ្យថ្នាក់ដឹកនាំ មន្ត្រីរាជការក្រសួងវប្បធម៌ និងវិចិត្រសិល្បៈ សូមចូលរួមរំលែកមរណទុក្ខដ៏ក្រៀមក្រំបំផុតនេះជាមួយក្រុមគ្រួសារនៃសព និងសូមឧទ្ទិសបួងសួងដល់ដួងវិញ្ញាណក្ខន្ធរបស់ លោកព្រឹទ្ធាចារ្យកោលស្យវោហារ គង់ ណៃ សូមបានទៅសោយសុខក្នុងសុគតិភពកុំបីឃ្លៀងឃ្លាតឡេីយ៕
