ពោធិ៍សាត់៖ ដោយអនុវត្តតាមមតិចង្អុលការណែនាំរបស់លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ស្ដីពីការការពារសន្តិសុខសណ្ដាប់ធ្នាប់ជូនប្រជាពលរដ្ឋក្នុងមូលដ្ឋានឲ្យកាន់តែល្អប្រសើរនោះ កាលពីថ្ងៃទី២៥ ខែមិថុនា ឆ្នាំ២០២៤ វេលាម៉ោង៨និង៤៥នាទីព្រឹក កម្លាំងអន្តរាគមន៍ និងកម្លាំងជំនាញនៃអធិការដ្ឋាននគរបាលក្រុងពោធិ៍សាត់សហការជាមួយកម្លាំងប៉ុស្តិ៍នគរបាលរដ្ឋបាលស្វាយអាត់ មានការចូលរួមពីលោកចៅសង្កាត់ លោកអនុមេភូមិ បានចុះបង្ក្រាបករណីប្រើប្រាស់ដោយខុសច្បាប់នូវសារធាតុញៀន នៅចំណុចមុខវិទ្យាល័យទាចំរ៉ាត់ ស្ថិតនៅភូមិស្វាយអាត់ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់។
លោកវរសេនីយ៍ឯក កែវ សារិ បានឲ្យដឹងថាសមត្ថកិច្ចបានឃាត់ខ្លួនជនសង្ស័យចំនួន១នាក់ ឈ្មោះ ជ្រឺ ភា ភេទប្រុស អាយុ២៩ឆ្នាំរស់នៅភូមិគក សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ នឹងវត្ថុតាងរួមមាន ម្សៅក្រាមពណ៌សថ្លាសង្ស័យសារធាតុញៀនចំនួន១កញ្ចប់តូច ,ម៉ូតូ ចំនួន១គ្រឿង ,ទូរសព្ទដៃចំនួន១គ្រឿង។
ក្រោយមកឈ្មោះ ជ្រឺ ភា បានសារភាពថាខ្លួនបានទិញថ្នាំញៀនពីឈ្មោះ មៀច ផល្លា ហៅប៉ែត ភេទប្រុស អាយុ៤១ឆ្នាំ រស់នៅភូមិស្វាយអាត់ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ កម្លាំងសមត្ថកិច្ចកំពុងធ្វេីការស្រាវជ្រាវបន្តនីតិវិធី តាមចាប់ជនសង្ស័យឈ្មោះ មៀច ផល្លា ហៅប៉ែត បន្តទៀត។
បច្ចុប្បន្នជនសង្ស័យឈ្មោះ ជ្រឺ ភា រួមជាមួយវត្ថុតាងត្រូវបានសមត្ថកិច្ចឃាត់ខ្លួនជាបណ្តោះអាសន្ននៅអធិការដ្ឋាននគរបាលក្រុងពោធិ៍សាត់ ដើម្បីចាត់ការតាមនីតិវិធី៕
