តាកែវ៖ ក្រោយពីបានទទួលព័ត៌មានថា កាលពីវេលាម៉ោង១០,១៥ ថ្ងៃទី០៤ ខែមិថុនា ឆ្នាំ២០២៤ នៅក្នុងបរិវេណវិទ្យាល័យ ជាស៊ីម តាកែវ មានសិស្សានុសិស្ស កំពុងលបលួចសម្ងំជក់បារីអេឡិចត្រូនិច(Yooz)។ ភ្លាមនោះលោកវរសេនីយ៍ឯក ឥន្ទ មណ្ឌល អធិការ នៃអធិការដ្ឋាននគរបាលក្រុងដូនកែវ បានបញ្ជាឲ្យកម្លាំអធិការដ្ឋាន សហការជាមួយកម្លាំងប៉ុស្តិ៍នគរបាលរដ្ឋបាលរកាក្នុង ដឹកនាំដោយលោកអនុសេនីយ៍ឯក ឡាយ ហាប់ អធិការរង ចុះទៅដល់ទីតាំងខាងលើ ដើម្បីធ្វើការសួរនាំ និងស្វែងរកមើលក្រុមក្មេងៗដែលជាសិស្សសាលាទាំងនោះ ហើយក៏ឃើញមានសិស្ស០២នាក់ និងឆែកឃើញមានបារីអេឡិចត្រូនិច(Yooz)នៅក្នុងកាតាបដែលកំពុងស្ពាយជាប់នៅនឹងខ្លួន។ ឃើញដូចនោះក្រុមការងារក៏បានហៅក្មេងប្រុស ដែលជាសិស្សសាលាទាំង០២នាក់យកកាន់អធិការដ្ឋាន ដើម្បីធ្វើការសាកសួរ។
ក្រោយពីបានសួរនាំពួកគាត់ទាំង០២នាក់ បានទទួលស្គាល់ និងទទួលនូវកំហុសរបស់ខ្លួន និងដោយអនុវត្តតាមប្រសាសន៍ណែនាំពីសំណាក់លោកឧត្ដមសេនីយ៍ទោ ឈាង ផាន់ណារ៉ា ស្នងការនៃស្នងការដ្ឋាននគរបាលខេត្តតាកែវ ក៏បានធ្វើការណែនាំ អប់រំ ធ្វើកិច្ចសន្យា និងឲ្យអាណាព្យាបាលធ្វើលិខិតធានាយកទៅអប់រំបន្ត៕
ប្រភព៖ អធិការដ្ឋាននគរបាលក្រុងដូនកែវ
