ភ្នំពេញ៖ មន្ត្រីជំនាញផ្នែកម្ហូបអាហារ នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នាដើមខែឧសភា ឆ្នាំ២០២៤ ដែលប្រចាំនៅតាមទីផ្សារគោលដៅតាមបណ្ដារាជធានី ខេត្តបានដឹកនាំមន្ត្រីរបស់ខ្លួនចុះត្រួតពិនិត្យទំនិញគ្រប់ប្រភេទ រួមមាន បន្លែ ត្រី សាច់ សាច់បង្កក គ្រឿងក្នុងមាន់ ប្រហិត ផលិតផលផ្អាប់ ផលិតផលកំប៉ុង ជាដើម ដើម្បីការពារផលិតផលទាំងនោះពុំមានអនុលោមភាពសម្រាប់អ្នកប្រើប្រាស់ ពោលគឺខូចគុណភាព ហួសកាលបរិច្ឆេទ ផ្ទុកសារធាតុគីមីដែលប៉ះពាល់សុខភាពអ្នកប្រើប្រាស់។
ជាលទ្ធផលនៃការត្រួតពិនិត្យមន្ត្រីជំនាញបានដកហូតទំនិញមិនមានភាពអនុលោមចំនួន ៥១៩.៤៦គីឡូក្រាម ដោយទំនិញទាំងអស់នោះត្រូវបានធ្វើការកម្ទេចចោលភ្លាមៗ។ មន្ត្រីជំនាញក៏បានធ្វើអប់រំបន្ថែមដល់ប្រជាអាជីវករឱ្យបានយល់ដឹងផ្នែកសុវត្ថិភាពម្ហូបអាហារ និងការទុកដាក់ឱ្យត្រូវតាមបទប្បញ្ញតិ្តបច្ចេកទេសផងដែរ៕
ប្រភព៖ អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF
