ព្រះសីហនុ៖ ឯកឧត្តម គួច ចំរើន អភិបាល នៃគណៈអភិបាលខេត្តព្រសីហនុ អញ្ជើញដឹកនាំកិច្ចប្រជុំ បូកសរុបលទ្ធផលការងារប្រចាំខែមេសា និងលើកទិសដៅប្រចាំខែឧសភា ឆ្នាំ២០២៤ នៅសាលាខេត្តព្រះសីហនុ នាព្រឹកថ្ងៃចន្ទ ១៣រោច ខែចេត្រ ឆ្នាំរោង ឆស័ក ព.ស ២៥៦៧ ត្រូវនឹងថ្ងៃទី០៦ ខែឧសភា ឆ្នាំ២០២៤ ដោយមានការចូលរួមពីលោកអភិបាលរងខេត្ត អភិបាលក្រុង ស្រុក ប្រធានមន្ទីរ អង្គភាពពាក់ព័ន្ធ កងកម្លាំងប្រដាប់អាវុធ ចំណុះរដ្ឋបាល ខេត្តព្រះសីហនុ។
កិច្ចប្រជុំបូកសរុបលទ្ធផលការងារប្រចាំខែមេសា និងលើកទិសដៅការងារខែឧសភា ឆ្នាំ២០២៤ មានរបៀបវារ:ចំនួន១១គឺ៖ ១-មតិដឹកនាំកិច្ចប្រជុំដោយ, ២-របាយការណ៍ ស្តីពីការដាំកូន ក្ងោក តាមបណ្តោយផ្លូវជាតិលេខ៤ និងការដាំដើមគគីរ និងដើមក្រញូងនៅ មណ្ឌលបន្សាបគ្រឿងញៀន កែវផុស, ៣-របាយការណ៍ ស្តីពីគម្រោងស្តារប្រឡាយ ជើងក្អែប, ៤-របាយការណ៍ ស្តីពីស្ថានភាពការផ្គត់ផ្គង់ទឹកស្អាត, ៥-ផ្សព្វផ្សាយសេចក្តីណែនាំ ស្តីពីដំណើរការ នៃការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពី “កំណែទម្រង់វិមជ្ឈការ និងវិសហមជ្ឈការ ដើម្បីសម្រេចបានចក្ខុវិស័យកម្ពុជាឆ្នាំ២០៥០”, ៦-ផ្សព្វផ្សាយរបាយការណ៍ ស្តីពីលទ្ធផលកិច្ចប្រជុំពិនិត្យ និងពិភាក្សាអំពីដំណើរការ នៃការត្រួតពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន, ៧-ផ្សព្វផ្សាយរបាយការណ៍លទ្ធផល នៃកិច្ចប្រជុំពិគ្រោះយោបល់អំពីវឌ្ឍនភាព និងបញ្ហា ប្រឈមនានា ពាក់ព័ន្ធនឹងការគ្រប់គ្រងមន្ត្រី បុគ្គលិកនៅរដ្ឋបាលថ្នាក់ក្រោមជាតិ, ៨-ផ្សព្វផ្សាយសេចក្តីជូនដំណឹងលេខ ១២២២ ស.ជ.ណ ចុះថ្ងៃទី១១ ខែមេសា ឆ្នាំ២០២៤ របស់ ក្រសួងមហាផ្ទៃ ស្តីពីការពង្រឹងការគ្រប់គ្រង ការថែរក្សា និងការការពារធនធានធម្មជាតិ នៅតាមរាជធានី ខេត្ត, ៩-ផ្សព្វផ្សាយសេចក្តីជូនដំណឹងលេខ ៤៧០ ស.ជ.ណ ចុះថ្ងៃទី០៨ ខែមេសា ឆ្នាំ២០២៤ របស់ទីស្តីការគណៈរដ្ឋមន្ត្រី ស្តីពីរបាយការណ៍បូកសរុបសកម្មភាព និងលទ្ធផលការងាររបស់ក្រុមការងាររាជរដ្ឋាភិបាលចុះមូលដ្ឋាន, ១០-ការចូលរួមមតិ យោបល់របស់អង្គប្រជុំ, ១១-មន្ទីរ អង្គភាព ពិនិត្យការផ្តល់គ្រឿងឥស្សរិយយស ជូនមន្ត្រីរាជការក្រោមឱវាទ។
បន្ទាប់ពីស្តាប់រាយការណ៍ និងបទបង្ហាញរួចមក ឯកឧត្តម គួច ចំរើន អភិបាលខេត្តព្រះសីហនុ បានធ្វើការកោតសរសើរវាយតម្លៃខ្ពស់ចំពោះមន្ទីរកសិកម្ម ដែលបានខិតខំថែទាំដើមឈើ មានដូចជា ស្រោចទឹក ការដាំដុះ ជួសឡើងវិញ នូវដើមឈើដែលបានងាប់ ការកាច់បំផ្លាញ និងគ្រោះថ្នាក់ចរាចរណ៍បុកដួលដើម ឈើ នៅតាមដងផ្លូវមួយចំនួនក្នុងក្រុងព្រះសីហនុក្នុងរដូវប្រាំងនេះ ដែលបានអូសបន្លាយ រហូតដល់ដើមខែឧសភា ២០២៤ ដែលមានកូនឈើចំនួន ៨មុខនៅតាមដងផ្លូវ សំខាន់ក្នុងក្រុង ហើយនៅពេលខាងមុខ យើងនឹងត្រូវបន្តការដាំកូនក្ងោកនៅ តាមបណ្តោយ ផ្លូវជាតិលេខ៤ ចាប់ពីរង្វង់មូលជិតព្រលានយន្តហោះអន្តរជាតិខេត្តព្រះសីហនុ រហូតមកដល់ ក្រុងព្រះសីហនុ ដែលគ្រោងដាំដុះកូនក្ងោកពី៥ ទៅ ៦ពាន់ដើម ដូច្នេះគ្រប់មន្ទីរ អង្គភាព និងកងកម្លាំងរបស់យើងត្រៀមរៀបចំចូលរួមដាំកូនក្ងោកនៅចុងខែឧសភា ឬដើមខែមិថុនា នៅពេលមានភ្លៀងធ្លាក់ជោកជាំ ដើម្បីចូលរួមលើកកម្ពស់សោភណភាព បរិស្ថានកាន់ តែមានភាពស្រស់បំព្រង។
ឯកឧត្តមអភិបាលខេត្ត ក៏បានធ្វើការវាយតម្លៃចំពោះលទ្ធផលការងារសម្រាប់ខែមេសា ដែលគ្រប់់ មន្ទីរ អង្គភាពបានចូលរួមសហការគ្នាបំពេញការងារ ភារកិច្ចរបស់ខ្លួនបានល្អ ទន្ទឹមនោះយើងត្រូវខិតខំបន្ថែមទៀតពីគ្រប់មន្ទីរ អង្គភាព និងវិស័យឯកជន ដើម្បីខេត្តរបស់យើងទទួលបានការអភិវឌ្ឍ និងទទួលបានសមិទ្ធផលថ្មីៗបន្ថែមទៀត ក្នុងការចូលរួមកាត់បន្ថយភាពក្រីក្ររបស់ប្រជាពលរដ្ឋ៕
ប្រភព៖ AKP
