ព្រះសីហនុ៖ មនុស្សស្រី៣នាក់ ជាភាគីខាងម៉ូតូ បានរងរបួសធ្ងន់ ក្នុងគ្រោះថ្នាក់ចរាចរណ៍ បុកប៉ះគ្នារវាង រថយន្តនិងម៉ូតូ នៅវេលាម៉ោង០៧:៣០នាទីព្រឹក ថ្ងៃទី១១ ខែតុលា ឆ្នាំ២០២៣ លើផ្លូវជាតិលេខ៤ ចន្លោះគីឡូម៉ែត្រ១៦៥-១៦៦ ស្ថិតក្នុងភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ។
យោងតាមរបាយការណ៍បឋមពីសមត្ថកិច្ចឲ្យដឹងថានេះជាគ្រោះថ្នាក់ចរាចរ ណ៍ រថយន្ដបុកប៉ះម៉ូតូ គឺរថយន្ដ ០១គ្រឿង HYUNDAI PORTER II ពណ៌ខៀវ ពាក់ផ្លាកលេខ ព្រះសីហនុ 2C-3158 មានទិសដៅភ្នំពេញ -ព្រះសីហនុ អ្នកបើកបរ(មិនទាន់ស្គាល់អត្តសញ្ញាណ) បើកបរគេចក្រឡុកទៅខាងឆ្វេងដៃរបស់ខ្លួន រួចជ្រុលទៅបុកជាមួយម៉ូតូ០១គ្រឿងចំពីខាងមុខពេញទំហឹង ម៉ាក HONDA DREAM ពណ៌ខ្មៅ ពាក់ផ្លាកលេខ កណ្ដាល 1AH-2214 មានទិសដៅផ្ទុយគ្នា បើកបរដោយឈ្មោះឡូត សាឡែត ភេទស្រី អាយុ៣០ឆ្នាំ មុខរបរលក់ដូរ និងអ្នករួមដំណើរក្មេងស្រីចំនួន០២នាក់៖
១.ឈ្មោះ សេក នាង ភេទស្រី អាយុមុខរបរនៅផ្ទះ
២.ឈ្មោះ ធាន់ ថុនា ភេទស្រី អាយុមុខរបរសិស្ស។ អ្នកទាំង០៣មានទីលំនៅភូមិតាំងឬស្សី ឃុំការជន្លឹង ស្រុកខ្សាច់កណ្ដាល ខេត្តកណ្ដាល បណ្ដាលឲ្យភាគីខាងម៉ូតូទាំង០៣នាក់រងរបួសធ្ងន់បាក់ជើងឆ្វេងដូចគ្នា (អ្នកបើកបរម៉ូតូនិងអ្នករួមដំណើរពាក់មួកសុវត្ថិភាព)។
បច្ចុប្បន្ន ជនរងគ្រោះបានបញ្ជូនសម្រាកព្យាបាលនៅគ្លីនិចឯកជន ឃុំវាលរេញ រីឯវត្ថុតាង(រថយន្ដនិងម៉ូតូ) យកមករក្សាទុកជាបណ្ដោះអាសន្ននៅអធិការដ្ឋាននគរបាលស្រុកព្រៃនប់ ។ដោយឡែកអ្នកបើកបររថយន្ដបានរត់គេចខ្លួនបាត់ក្រោយពេលកើតហេតុ ៕
ប្រភព៖ Huy Bunleng News
