ភ្នំពេញ៖ ករណីអំពើ លួចមានស្ថានទម្ងន់ទោដោយសារការប្រើប្រាស់អំពើហិង្សា(ឆក់យកទូរស័ព្ទមិនបានសម្រេច) និងកាន់កាប់អាវុធដោយគ្មានការអនុញ្ញាត(ប្រើកាំភ្លើងខ្លីប្រើហ្គាស) នៅចំណុចខាងមុខផ្ទះលេខ៣៥៩ ផ្លូវ៨៧BT ភូមិត្នោតជ្រុំ១ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ កាលពីថ្ងៃទី២៨ ខែកញ្ញា ឆ្នាំ២០២៣ វេលាម៉ោង០២និង៣០នាទីរំលងអាធ្រាត្រ ។
ជនរងគ្រោះឈ្មោះ ហេង បូផា ភេទស្រី អាយុ១៧ឆ្នាំ ស្នាក់នៅផ្ទះលេខ៣៥D ផ្លូវ២៦BT ភូមិក្បាលទំនប់ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ។
ជនសង្ស័យចំនួន០២នាក់
ទី១-ឈ្មោះ ចាន់ ពិសិដ្ឋ ភេទប្រុស អាយុ៣០ឆ្នាំ ស្នាក់នៅផ្ទះជួល សង្កាត់ស្រះចក ខណ្ឌដូនពេញ រាជធានីភ្នំពេញ មុខរបរ មិនពិតប្រាកដ (ឃាត់ខ្លួនមានផ្ទុកសារធាតុញៀន)
ទី២-ឈ្មោះ កង សុភាព ភេទប្រុស អាយុ២៧ឆ្នាំ ស្នាក់នៅផ្ទះជួល សង្កាត់ស្រះចក ខណ្ឌដូនពេញ រាជធានីភ្នំពេញ (ឃាត់ខ្លួនមានផ្ទុកសារធាតុញៀន) ។
សម្ភារចាប់យករួមមាន៖ ម៉ូតូចំនួន០១គ្រឿង ម៉ាកMio ពណ៌ខៀវ ផ្លាកលេខភ្នំពេញ១IM_៧១១៦ និង កាំភ្លើងខ្លីប្រើហ្គាសចំនួន០១ដើម ម៉ាកGLock ពណ៌ខ្មៅ បង់ចំនួន០១ ។
កាលពីថ្ងៃទី២៨ ខែកញ្ញា ឆ្នាំ២០២៣ វេលាម៉ោង០២ និង៣០នាទីរំលងអាធ្រាត្រ ជនរងគ្រោះឈ្មោះ ហេង បូផា បានជិះចេញម៉ូតូចំនួន០១គ្រឿងចេញពីកោះពេជ្រ ដោយប្តីរបស់ជនរងគ្រោះឈ្មោះ ម៉ម ពន្លឺ ភេទប្រុស អាយុ១៨ឆ្នាំ ជាអ្នកឌុបដើម្បីជិះត្រឡប់ទៅផ្ទះនៅសង្កាត់បឹងទំពន់ទី២ នៅពេលដែលជនរងគ្រោះ និងប្តីជិះម៉ូតូមកដល់ចំណុចខាងមុខផ្ទះលេខ៣៥៩ ភូមិត្នោតជ្រុំ១ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ(ចំណុចកើតហេតុ) ជនរងគ្រោះបានខឹងប្តីរួចចុះពីលើម៉ូតូដើរ ដោយមានកាន់ទូរស័ព្ទដៃចំនួន០១គ្រឿង ស្រាប់តែមានជនសង្ស័យចំនួន០២នាក់ ដោយឈ្មោះ ចានពិសិដ្ឋ ជាអ្នកជិះម៉ូតូចំនួន០១គ្រឿង ម៉ាកMio ពណ៌ខៀវ ផ្លាកលេខភ្នំពេញ ១IM_៧១១៦ ឌុបជនសង្ស័យឈ្មោះកង សុភាព មកក្បែរជនរងគ្រោះបម្រុងឆក់យកទូរស័ព្ទដៃ ភ្លាមនោះប្តីរបស់ជនរងគ្រោះបានឃើញទាន់ ក៏ជិះម៉ូតូទៅស្ទាក់ពីមុខម៉ូតូរបស់ជនសង្ស័យទាំង០២នាក់ខាងលើ។ បន្ទាប់មកជនសង្ស័យឈ្មោះ ចាន់ពិសិដ្ឋ បានដកកាំភ្លើងខ្លីចំនួន០១ដើម(ប្រើហ្គាស)ចេញពីឃ្លុបម៉ូតូផ្នែកខាងមុខ អាមេ ភ្ជង់ទៅលើជនរងគ្រោះ និងប្តី ប៉ុន្តែកាំភ្លើងបានគាំង ទើបជនសង្ស័យទាំង០២នាក់ខាងលើបានបន្ថែមល្បឿនម៉ូតូជិះគេចខ្លួន រួចប្តីរបស់ជនរងគ្រោះបានជិះម៉ូតូដេញតាមពីក្រោយជនសង្ស័យ និងបានស្រែកឆោឡោ ឮដល់សមត្ថកិច្ចដែលល្បាតនៅជិតនោះជួយដេញតាមឃាត់បានជនសង្ស័យទាំង០២នាក់ខាងលើ រួមទាំងវត្ថុតាងនៅចំណុចច្រមុះជ្រូកស្ទឹងមានជ័យ យកមកធ្វើការសាកសួរនៅប៉ុស្តិ៍នគរបាលរដ្ឋបាលបឹងទំពន់ទី២ ។
បច្ចុប្បន្នជនសង្ស័យទាំងពីរនាក់ខាងលើ ត្រូវបានឃាត់ខ្លួននៅអធិការដ្ឋាននគរបាលខណ្ឌមានជ័យ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕
ប្រភព៖ ផ្នែកនគរបាលយុត្តិធម៌នៃអធិការខណ្ឌមានជ័យ
