ព្រះសីហនុ៖ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុដឹកនាំកិច្ចប្រជុំ ពង្រឹងវិធានការបញ្ចេញសំរាមនៅក្នុងក្រុងព្រះសីហនុ ឱ្យបានទៀងទាត់ និងទាន់ពេលវេលា ដើម្បីធានាឱ្យមានបរិស្ថានស្អាត នៅក្នុងខេត្ដព្រះសីហនុ។ កិច្ចប្រជុំនេះ ធ្វើឡើង នាថ្ងៃទី១៩ ខែកញ្ញា ឆ្នាំ២០២៣ ដោយមានការចូលរួមពីលោកអភិបាលរងខេត្ត លោកអភិបាលក្រុងព្រះសីហនុ លោកប្រធានមន្ទីរពាក់ព័ន្ធ និងនាយកគ្រប់គ្រងប្រមូលសំរាម KSWM និងអាជ្ញាធរពាក់ព័ន្ធនៅសាលាខេត្តព្រះសីហនុ។
ឯកឧត្តម គួច ចំរើន បានធ្វើការជំរុញការបញ្ចេញ និងប្រមូលសំរាមឱ្យបានទាន់ពេលវេលាឪ្យបានស្អាតនៅក្នុងទីក្រុងព្រះសីហនុ ដោយកំណត់ម៉ោងពេលបញ្ចេញសំរាម និងការប្រមូលសំរាម បើមិនគោរពតាមការណែនាំ ដើម្បីធានាថា សំរាមមិននៅពាសវាលពាសកាល គ្នានសណ្តាប់ធ្នាប់ដោយ សារខ្វះស្មារតីឯកភាព។ ឯកឧត្តមអភិបាលខេត្តបានធ្វើការណែនាំនូវចំណុចមួយចំនួនមានដូចជា អាជ្ញាធរក្រុង និងក្រុមហ៊ុន KSWM ត្រូវរៀបចំផ្សព្វផ្សាយអប់រំដល់ប្រជាពលរដ្ឋ ស្តីពីការបញ្ចេញសំរាមចាប់ពីម៉ោង៨ ដល់ ១០យប់ ក្រុមហ៊ុនប្រមូលសំរាមត្រូវមានភារ កិច្ចក្នុងការប្រមូលដឹកជញ្ជូនសំរាមចេញពីក្រុង ដោយធានាការទទួលខុសត្រូវ។ ទន្ទឹមនេះ មន្ទីរបរិស្ថាន អាជ្ញាធរក្រុង សង្កាត់ ភូមិត្រូវចូលរួមសហការគ្នាឱ្យបានល្អ ក្នុងការពិនិត្យការបញ្ចេញ និងប្រមូលសំរាមតាមកាលវិភាគជាក់ស្តែងនៅក្នុងភូមិសាស្ត្រសង្កាត់ទាំង៤។
ឯកឧត្ដមក៏បានស្នើឱ្យអាជ្ញាធរក្រុង និងក្រុមហ៊ុនប្រមូលសំរាមត្រូវបង្កើតគ្រុប ព្រមទាំងបំពាក់ GPS សម្រាប់ឡានដឹកសំរាម ងាយស្រួលត្រួតពិនិត្យតាមដានដោះស្រាយបានទាន់ពេលវេលា ចៀសវាងការឆ្លើយដាក់គ្នា ធ្វើឱ្យមានការកកស្ទះសំរាមនៅតាមទីតាំងណាមួយក្នុងក្រុងរបស់យើង។ ត្រូវថតគំនរសំរាមបង្ហោះចូលក្នុងគ្រុបការងារ និងចូលរួមកែទម្លាប់ការបោះចោលសំរាមបែបអនាធិបតេយ្យមកជាសណ្តាប់ធ្នាប់ ក្រុមហ៊ុនត្រូវដំឡើងផែនទីខ្សែផ្លូវនៅក្នុងក្រុង តាមដានគ្រប់គ្រងបញ្ហាសំរាមនៅក្នុងទីក្រុង។
ឯកឧត្ដមអភិបាលខេត្ដបានលើកឡើងថា ខេត្ដក៏មានទីលានផ្ទេរសំរាមបណ្តោះអាសន្ន សម្រាប់ធ្វើការដឹកជញ្ជូនចេញទៅទីលាន ត្រូវអនុវត្តន៍វិធានការអនុក្រិត្យ លេខ១១៣ ស្តីពីការផាកពិន័យអន្តរកាលទៅតាមច្បាប់ក្រសួងបរិស្ថាន គ្របគ្រងប្រព័ន្ធទិន្នន័យ នៃការប្រមូលសំរាមមានលក្ខណវិទ្យាសាស្ត្រក្នុងក្រុងព្រះសីហនុ។ ក្រៅពីក្រុមហ៊ុនប្រមូលសំរាម KSWM ក៏មានក្រុមហ៊ុនប្រមូលកាកសំណល់សំណង់ ២ទៀត ដែលកំពុងប្រតិបត្តិការក្នុងក្រុងព្រះសីហនុ ដោយការទទួលខុសត្រូវ ហើយត្រូវបើកយុទ្ធនាការអប់រំផ្សព្វផ្សាយ ចុះបិទស្ទីកឃ័រនៅតាមខ្នងផ្ទះប្រជាពលរដ្ឋ ស្តីពីការបញ្ចេញ និងប្រមូលសំរាម ទាក់ទងសំរាមនៅតាមផ្លូវតូចៗ ពិសេសប្រជាពលរដ្ឋអាចបញ្ចេញសំរាមដោយខ្លួនឯងនៅម៉ោង ៨ដល់ ១០យប់ ឱ្យមានតម្លាភាព។
ឯកឧត្ដម គួច ចំរើន ក៏បានណែនាំត្រូវឯកភាពគ្នាតាមកម្មវិធីនៃការបញ្ចេញសំរាម និងការប្រមួលសំរាម ដើម្បីសោភណភាពក្រុងព្រះសីហនុស្អាត បៃតង ហើយអ្នកដែលមិនបានចូលរួមនៅតែបំពាននឹងត្រូវធ្វើការផាកពិន័យតាមអនុក្រឹត្យលេខ១១៣៕
ប្រភព៖ ទីភ្នាក់ងារសារព័ត៌មានកម្ពុជា
