បាត់ដំបង៖ នៅថ្ងៃព្រហស្បត្តិ ៧រោច ខែពិសាខ ឆ្នាំថោះ បញ្ចស័ក ឆ្នាំថោះ ព.ស.២៥៦៧ ត្រូវនឹងថ្ងៃទី១១ ខែឧសភា ឆ្នាំ២០២៣ វេលាម៉ោង១៤នឹង១៥នាទី នៅចំណុចក្រុមទី៥ ភូមិចែងក្ដារ ឃុំភ្នំសំពៅ ស្រុកបាណន់ ខេត្តបាត់ដំបង មានករណីបុរសម្នាក់លង់ទឹកអណ្ដូងស្លាប់បាត់បង់ជីវិត ជនរងគ្រោះឈ្មោះ ឡាច សុផាន ហៅ ញ៉ិ ភេទប្រុស អាយុ ៥៣ឆ្នាំ រស់នៅក្រុមទី៥ ភូមិចែងក្ដារ ឃុំភ្នំសំពៅ ស្រុកបាណន់ ខេត្តបាត់ដំបង។ តាមការរាយការណ៍ពីសាច់ញាតិជនរងគ្រោះបានអោយដឹងថា បុរសរងគ្រោះបានទៅចុះរាវខ្យងនៅអណ្ដូងខាងលិចផ្ទះចំងាយប្រហែល ២០ម៉ែត្រ ដែលមានជំរៅ ០,៨០ម៉ែត្រ ទើបបណ្តាលអោយលង់ទឹកស្លាប់ក្នុងអណ្ដូងហើយក៏ត្រូវបានអ្នកភូមិជួយស្រង់លើកមកដាក់នៅលើគ្រែផ្ទះសព។
ក្រោយពីទទួលបានពត៌មាន កម្លាំងនគរបាលផ្នែកជំនាញស្រុកសហការជាមួយលោកគ្រូពេទ្យជំនាញ បានចុះត្រួតពិនិត្យ និងវិភាគទីកន្លែងកើតហេតុលើជនគ្រោះឈ្មោះ ឡាច សុផាន ពិតជាលង់ទឹកអណ្ដូងស្លាប់ពិតប្រាកដមែន។ បច្ចុប្បន្ន សាកសពជនរងគ្រោះត្រូវបានប្រគល់ជូនទៅឲ្យក្រុមគ្រួសារដើម្បីយកទៅធ្វើបុណ្យតាមប្រពៃណីទំនៀមទំលាប់៕
ប្រភព៖ នាយកដ្ឋានផ្សព្វផ្សាយអប់រំ
