ព្រះសីហនុ៖ ករណីជម្លោះហឹ ង្សា រវាងជនជាតិខ្មែរ ជាមួយជនជាតិចិននិងជនជាតិវៀតណាម នៅអាគារមួយកន្លែងម្តុំអូរសំអាត ក្នុងក្រុងព្រះសីហនុ ម៉ោងជិត៧យប់ថ្ងៃ២៦មីនា២០២៣ ដែលបង្កការភ្ញាក់ផ្អើលដល់ពលរដ្ឋច្រើននាក់ផងនោះ ក្រោយកើតហេតុ នគរបាលឃាត់ខ្លួនជនជាតិចិននិងជនជាតិវៀតណាមជិត១០នាក់ និងជនជាតិខ្មែរ៥នាក់ នាំយកមកស្នងការដ្ឋាននគរបាលខេត្តព្រះសីហនុ ក្នុងនោះសមត្ថកិច្ចអះអាងថា ជនជាតិចិន និងវៀតណាមដែលពាក់ពន្ធ័នឹងរឿងនេះ អាចប្រឈមនឹងការបណ្តេញចេញពីកម្ពុជាផងដែរ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ដព្រះសីហនុ ឲ្យបណ្តាញផ្សព្វផ្សាយដឹងថា ករណីហឹ ង្សានេះ កើតឡើងនៅពេលដែលជនជាតិខ្មែរទាំង៥នាក់ បានទៅយកឥវ៉ាន់ដែលផ្ញើមកពីវៀតណាម ដើម្បីបញ្ជូនទៅកាន់ទីតាំងផ្សេងៗ តែពេលទៅដល់នោះក៏ត្រូវជនជាតិចិន និងវៀតណាម ដែលជាជនបង្ក បានចាប់បង្ខាំង និងប្រើហឹ ង្សាលើជនជាតិខ្មែរ បង្កឲ្យមានការភ្ញាក់ផ្អើលពលរដ្ឋនៅកន្លែងកើតហេតុ ហើយកម្លាំងសមត្ថកិច្ចទាំងនគរបាលព្រហ្មទណ្ឌ និងកម្លាំងកងអន្តរាគមន៍ បានទៅអន្តរាគមន៍ និងឈានដល់ការឃាត់ខ្លួនពួកគេទាំងនេះនាំមកកាន់ស្នងការដ្ឋាននគរបាលខេត្តភ្លាមៗ ដើម្បីបន្តនិតិវិធី។
បើតាមលោកឧត្តមសេនីយ៍ទោ ជួន ណារិន្ទ ប្រាប់បណ្តាញព័ត៌មានបន្ថែមថា សម្រាប់ជនជាតិចិន និងវៀតណាម ដែលចាប់បង្ខាំងនិងបង្កហឹ ង្សាមកលើជនជាតិខ្មែរនេះ ក្នុងករណីរកឃើញថា មានបញ្ហាទោសទណ្ឌធ្ងន់ធ្ងរ សមត្ថកិច្ចនឹងធ្វើតាមនីតិវិធី ឈានទៅដល់ការបណ្តេញចេញពីកម្ពុជាទៀតផង៕
ប្រភព៖ Huy Bunleng News
