ពោធិ៍សាត់៖ កាលពីថ្ងៃច័ន្ទ១៤រោច ខែផល្គុន ឆ្នាំខាល ចត្វាស័កព.ស២៥៦៦ ត្រូវនឹងថ្ងៃទី២០ ខែមីនា ឆ្នាំ២០២៣ វេលាម៉ោង៩និង២៦នាទីព្រឹក មានករណីគ្រោះថ្នាក់ចរាចរណ៍រថយន្តបុកជាមួយម៉ូតូបត់ឆ្វេងឆ្លងផ្លូវស្របទិសគ្នា បណ្ដាលឲ្យរងរបួសធ្ងន់០២នាក់ ហេតុការណ៍នេះកើតឡើងនៅលើផ្លូវជាតិលេខ៥៥ចន្លោះគីឡូម៉ែត្រ ២៥–២៦ ស្ថិតនៅភូមិសំរោង១ ឃុំសំរោងស្រុកភ្នំក្រវាញខេត្តពោធិ៍សាត់ បង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចុះទៅដល់កន្លែងកើតហេតុ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញមានម៉ូតូ០១គ្រឿង ម៉ាកវ៉េវ សេរីចាស់ ពណ៌ក្រហមគ្មានស្លាកលេខ បើកបរដោយឈ្មោះ ឃឹម សាន ភេទប្រុស អាយុ៦៧ឆ្នាំ រស់នៅភូមិអូរហេង ឃុំសំរោង ស្រុកភ្នំក្រវាញខេត្តពោធិ៍សាត់(រងរបួសធ្ងន់)និងអ្នករួមដំណើរជាមួយត្រូវជាចៅឈ្មោះ ឃឹម នីកា ភេទស្រី អាយុ០៨ឆ្នាំ រស់នៅភូមិ ក្សេត្របូរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់(រងរបួសធ្ងន់)បើកបរពីត្បូងទៅជើងលុះមកដល់ចំណុចកើតហេតុខាងលើក៏បានបត់ឆ្វេងឆ្លងផ្លូវស្រាប់តែមានរថយន្ត០១គ្រឿង ម៉ាកហាយឡិនឌ័រ សេរី២០០៣ ពណ៌ទឹកប្រាក់ ពាក់ស្លាកលេខ ភ្នំពេញ2Q-6816 បុកយ៉ាងពេញទំហឹង បើកបរដោយឈ្មោះ ឆេង គឹមហុង ភេទប្រុស អាយុ ៣៤ឆ្នាំ រស់នៅភូមិពពាល ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។
រីឯអ្នករងរបួសធ្ងន់ត្រូវបានសមត្ថកិច្ចនឹងក្រុមគ្រូពេទ្យបញ្ជូនទៅសង្គ្រោះនៅមន្ទីរពេទ្យបង្អែកខេត្តពោធិ៍សាត់។
លោកវរសេនីយ៍ទោ ចែត សម្បត្តិ អធិការរងនៃអធិការដ្ឋាននគរបាលស្រុកភ្នំក្រវាញបានឲ្យដឹងទៀតថា បន្ទាប់ពីកម្លាំងនគរបាលចរាចរណ៍បានចុះទៅពិនិត្យនិងធ្វើការវាស់វែងរួចហើយបានសន្និដ្ឋានថាករណីគ្រោះថ្នាក់ចរាចរណ៍នេះបណ្ដាលមកពីអ្នកបើកបរម៉ូតូឆ្លងផ្លូវខ្វះការប្រុងប្រយ័ត្ន។
រីឯវត្ថុតាងខាងលើសមត្ថកិច្ចយកមករក្សាទុកនៅ អធិការដ្ឋាននគរបាលស្រុកភ្នំក្រវាញរង់ចាំដោះស្រាយតាមនីតិវិធី៕
ប្រភព៖ នាយកដ្ឋានផ្សព្វផ្សាយអប់រំ
