មណ្ឌលគិរី ៖ នៅថ្ងៃទី៣ ខែមករា ឆ្នាំ២០២៣ វេលាម៉ោង២០ និង០០នាទី ក្រោមការចង្អុលបង្ហាញ បញ្ជាដឹកនាំដោយផ្ទាល់ពីលោកឧត្តមសេនីយ៍ទោ ស្នងការនគរបាលខេត្តមណ្ឌលគិរី កម្លាំងជំនាញការិយាល័យប្រឆាំងគ្រឿងញៀន សហការជាមួយកម្លាំង នៃអធិការដ្ឋាននគរបាលក្រុងសែនមនោរម្យ និងកម្លាំងប៉ុស្ដិ៍នគរបាលរដ្ឋបាលមនោរម្យ និងមានការសម្របសម្រួលពីលោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្ត កម្លាំងសមត្ថកិច្ចបានចុះធ្វើការបង្ក្រាបករណី ជួញដូរ រក្សាទុកនូវសាធាតុញៀនដោយខុសច្បាប់មួយកន្លែង ស្ថិតនៅត្រង់ចំណុចផ្លូវក្រួសក្រហម ក្បែរផ្ទះលោក សាន សុភា ចំងាយប្រហែល ១០០ម៉ែត្រ ក្នុងភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី ។
សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ប៊ុន ណារិទ្ធិ ភេទប្រុស អាយុ៣៥ឆ្នាំ ជនជាតិខ្មែរ មុខរបរកម្មករ មានទីលំនៅបណ្ដោះអាសន្នភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ពិនិត្យទឹកម៉ូត្រអវិជ្ជមាន (-) ។
វត្ថុតាងដកហូតរួមមាន ៖
-ម្សៅពណ៌សថ្លា សង្ស័យជាសារធាតុញៀន មានចំនួន ៣កញ្ចប់តូច ទម្ងន់ ០,២៩ក្រាមថ្លឹងទាំងសំបក
-ម៉ូតូចំនួន ២គ្រឿង (ម៉ាក Honda Wave ១គ្រឿង ពណ៌ទឹកប្រាក់, ម៉ាក Wave ១គ្រឿង ពណ៌ខ្មៅ)
-ថង់វេចខ្ចប់ និងឧបករណ៍កែច្នៃសម្រាប់ជក់ថ្នាំញៀនមួយចំនួន
-គ្រាប់ពីដាងសម្រាប់បាញ់អាវុធកែច្នៃចំនួន ៣៧គ្រាប់ ។
ក្រោយមកកម្លាំង បានឆែកឆេរកន្លែងបោះតង់របស់ជនសង្ស័យនៅចំណុចក្នុងព្រៃក្បែរផ្លូវក្រួសក្រហម ស្ថិតនៅភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី ។ សមត្ថកិច្ចបានដុតបំផ្លាញតង់ និងសម្ភភារ:ទាំងនោះចោលទាំងអស់នៅនឹងកន្លែង ។
បច្ចុប្បន្នជនសង្ស័យខាងលើ ត្រូវបានកម្លាំងសមត្ថកិច្ចការិយាល័យប្រឆាំងគ្រឿងញៀន និងកម្លាំងអធិការដ្ឋាននគរបាលក្រុង កំពុងកសាងសំណុំរឿងបញ្ជូនខ្លួនជនសង្ស័យទៅតុលាការចាត់ការទៅតាមនីតិវិធីច្បាប់ ៕
ប្រភព៖ អគ្គស្នងការដ្ឋាននគរបាលជាតិ
