ព្រះវិហារ ៖ នៅថ្ងៃទី១៨ ខែតុលា ឆ្នាំ២០២២ វេលាម៉ោង១៩និង៣០នាទី កម្លាំងគណៈបញ្ជាការរដ្ឋបាលស្រុកឆែប បានធ្វើការឃាត់ខ្លួនជនបរទេសចំនួន១៦នាក់ ស្នាក់នៅដោយខុសច្បាប់បម្រុងឆ្លងដែនទៅប្រទេសឡាវ ។
ជនបរទេសទាំង១៦នាក់ មានជនជាតិចិន ចំនួន១៥នាក់(ស្រី០នាក់) និងជនជាតិមីយ៉ាន់ម៉ា ចំនួន០១នាក់(ស្រី) ។ ជនបរទេសខាងលើ ត្រូវបាននាំខ្លួនមកស្នងការដ្ឋាននគរបាលខេត្តព្រះវិហារ ដើម្បីរៀបចំសំណុំរឿងបញ្ជូនបន្តទៅស្នាក់ការត្រៀមបណ្ដេញចេញ ខេត្តសៀមរាប អនុវត្តនីតិវិធីបន្ត ។
ដោយឡែក មេខ្យល់ត្រៀមនាំជនបរទេសចេញចំនួន០២នាក់ ឈ្មោះ ជា វត្តនា ភេទប្រុស អាយុ២៧ឆ្នាំ មុខរបរកសិករ នៅស្រុកឆែប ខេត្តព្រះវិហារ និងឈ្មោះ អៀវ បូរី ភេទប្រុស អាយុ២៧ឆ្នាំ មុខរបរអ្នករត់តាក់ស៊ី នៅស្រុកឆែប ខេត្តព្រះវិហារ ត្រូវសមត្ថកិច្ចឃាត់ខ្លួន និងដកហូតរថយន្ដចំនួន២គ្រឿង ។ ជនសង្ស័យមេខ្យល់ទាំង២នាក់ និងវត្ថុតាង ត្រូវបានកសាងសំណុំរឿងបញ្ជូនទៅកាន់ អយ្យការអមសាលាដំបូងខេត្ត ចាត់ការតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
