ព្រះសីហនុ៖ សមត្ថកិច្ចព្រំដែនទឹកកម្ពុជាឲ្យដឹងថា មានសាកសពមនុស្ស៦នាក់ទៀត ដែលសន្និដ្ឋានថាជាជនជនរងគ្រោះ ករណីលិចទូកដឹកជនជាតិចិនមួយគ្រឿងក្នុងលម្ហសមុទ្រកោះតាងប្រទេសកម្ពុជា បានអណ្តែតទៅដល់ឆ្នេរសមុទ្រប្រទេសវៀតណាម ។ សេចក្តីរាយការណ៏ពីសមត្ថកិច្ចខេត្តមាត់សមុទ្រក្នុងប្រទេសវៀតណាម ប្រាប់សមត្ថកិច្ចកម្ពុជាថា អជ្ញាធរវៀតណាមបានប្រទះឃើញសាកសពមនុស្ស៦នាក់ អណ្តែតមកដល់ឆ្នេរសមុទ្រក្នុងប្រទេសវៀតណាម នៅវេលាម៉ោងជាង១០ព្រឹកថ្ងៃ២៩កញ្ញា២០២២នេះ ។ ក្រោយពិនិត្យសាកសពមនុស្សទាំង៦នាក់នេះ វាយតម្លៃជាមួយពេលវេលា សមត្ថកិច្ចខាងវៀតណាមធ្វើការសន្និដ្ឋានថាជាសាកសពជនរងគ្រោះលិចទូកនៅលម្ហសមុទ្រកោះតាង ប្រទេសកម្ពុជាកាលពីថ្ងៃទី២២ខែកញ្ញា២០២២ កន្លងទៅ ហើយករណីនេះសមត្ថកិច្ចប្រទេសវៀតណាមបានចាត់ចែងបន្តតាមនិតិវិធីក្នុងនយ័មនុស្សធម៌។
សុំបញ្ជាក់ថា ទូកមួយគ្រឿងដែលដឹកជនជាតិចិន៤១នាក់ ក្រោយលិចចូលទៅក្នុងលម្ហសមុទ្រកោះតាង ខាងកម្ពុជាយើងសង្គ្រោះនិងរកឃើញចំនួន២៤នាក់(ស្លាប់៣នាក់) និងខាងប្រទេសវៀតណាមសង្គ្រោះនិងរកឃើញចំនួន១៥នាក់(ស្លាប់៦នាក់) ដូចនេះអ្នកដែលបាត់ខ្លួន នៅសល់ចំនួន០២នាក់ទៀត៕
ប្រភព៖ Huy Bunleng News
.
