បាត់ដំបង៖ លោក អ៊ុច អ៊ុភីនីស្សារ៉ា ប្រធានមន្ទីរទេសចរ ណ៍ខេត្ត បានឱ្យដឹងនៅថ្ងៃ១កើត ខែអស្សុជ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃអាទិត្យ ទី២៦ ខែកញ្ញា ឆ្នាំ២០២២ថា មួយថ្ងៃបុណ្យនៃបុណ្យភ្ជុំបិណ្ឌ ខេត្តបាត់ដំបងទទួលបានភ្ញៀវទេសចរប្រមាណ ៦៣ ៧២៣នាក់ ។
តំបន់រមណីយដ្ឋាន និងតំបន់អេកូទេសចរណ៍ ក្នុងខេត្តបាត់ដំបងជាច្រើនកន្លែង បាននិងកំពុងទាក់ទាញភ្ញៀវទេសចរ ឱ្យចូលទៅទស្សនាកម្សាន្ដ ក្នុងពិធីបុណ្យភ្ជុំបិណ្ឌ។
យោងតាមរបាយការណ៍របស់មន្ទីរទេសចរណ៍ខេត្ត បានឱ្យដឹងថា នៅថ្ងៃទី២៥ ខែកញ្ញា ឆ្នាំ២០២២ នៅតាមតំបន់រមណីយដ្ឋាននានា ក្នុងខេត្តបាត់ដំបងទាំងមូល មានចំនួនភ្ញៀវទេសចរចូលទៅកម្សាន្ត ក្នុងឱកាសពិធីបុណ្យភ្ជុំបិណ្ឌសរុបប្រមាណ ៦៣ ៧២៣នាក់ ក្នុងនោះ ក៏មានភ្ញៀវទេសចរបរទេសផងដែរ។ នេះគិតតែចំនួនភ្ញៀវទេសចរជាតិ នៅថ្ងៃទី២៥ ខែកញ្ញា ឆ្នាំ២០២២ប៉ុណ្ណោះ ។ បើប្រៀបធៀបទៅនឹងឆ្នាំ២០២១ ដែលមានចំនួនតែ ១៩ ១៣៨នាក់ គឺកើនឡើង ២៣២,៩៧ភាគរយ។ ដោយឡែកសម្រាប់ភ្ញៀវទេសចរបរទេស (ទេសចរផ្ទៃក្នុង) មានចំនួន ៧៥នាក់ កើនឡើង ១០០ភាគរយ បើប្រៀបធៀបនឹងឆ្នាំ២០២១ ដែលគ្មាន១នាក់សោះ។
លោកប្រធានមន្ទីរ បានបន្ថែមថា បើសរុបចំនួនភ្ញៀវទេសចរទាំងអស់ មានចំនួន ៦៣ ៧៩៨នាក់ កើនឡើង ២៣៣,៣៦ភាគរយ បើប្រៀបធៀបនឹងឆ្នាំ២០២១ ដែលមានចំនួន ១៩ ១៣៨នាក់។ បើទោះបីជារយ:ពេលប៉ុន្មានថ្ងៃនេះ មានភ្លៀងធ្លាក់ជាបន្តបន្ទាប់ក៏ដោយ ក៏ភ្ញៀវទេសចរ បានសម្រុកមកដើរកម្សាន្ដយ៉ាងច្រើនដែរ ៕
ប្រភព៖ ក្រសួងព័ត៌មាន
