ប៉ៃលិន ៖ នៅថ្ងៃទី១៣ ខែសីហា ឆ្នាំ ២០២២ វេលាម៉ោង ២០និង២០នាទី មានករណីគ្រោះថ្នាក់ចរាចរណ៍រវាងម៉ូតូ២គ្រឿងប៉ះទង្គិចគ្នា ស្ថិតនៅចំណុចផ្លូវបំបែកពេជ្រគិរី ក្នុងភូមិពេជ្រគិរី សង្កាត់ឣូរតាវ៉ៅ ក្រុងប៉ៃលិន ខេត្តប៉ៃលិន បណ្តាលឲ្យមនុស្សរបួស០៥នាក់ (ធ្ងន់ចំនួន០២នាក់) ។
សមត្ថកិច្ចបានឲ្យដឹងថា ម៉ូតូទី១ម៉ាក Wave ពណ៌ខ្មៅ ពាក់ស្លាកលេខសៀមរាប 1A-0107 បើកបរដោយឈ្មោះ ណាង ស្រីនាង ភេទស្រី អាយុ១៨ឆ្នាំ ទីលំនៅភូមិសួរស្តី សង្កាត់ឣូរតាវ៉ៅ ក្រុងប៉ៃលិន ខេត្តប៉ៃលិន រងរបួសស្រាល ដោយមានឣ្នករួមដំណើរចំនួន ០៣នាក់ ៖ ១. ឈ្មោះ សាយ សៀវ ឣាយុ៥៨ឆ្នាំ (របួសធ្ងន់) ត្រូវបញ្ជួនបន្តទៅពេទ្យបាត់ដំបង ។ ២. ឈ្មោះ ណាង ស្រីលាភ ភេទស្រី ឣាយុ១៩ឆ្នាំ និង៣.ឈ្មោះ ចាន់ ភេទប្រុស ឣាយុ៤ឆ្នាំ រស់នៅភូមិ សង្កាត់ជាមួយគ្នា រងរបួសស្រាល ។
ចំណែកភាគីម្ខាងទៀតម៉ូតូម៉ាកហុងដាឌ្រីម ពណ៌ខ្មៅ គ្មានពាក់ស្លាកលេខ បើកបរដោយឈ្មោះ ខុំ ណាក់ ភេទ ប្រុស ឣាយុ៦០ឆ្នាំ រស់ភូមិពេជ្រគិរី សង្កាត់ឣូរតាវ៉ៅ ក្រុងប៉ៃលិន ខេត្តប៉ៃលិន (កំពុងសម្រាកព្យាបាលរបួសនៅមន្ទីរពេទ្យ) ។
បច្ចុប្បន្ន ករណីខាងលើនេះ កម្លាំងនគរបាលចរាចរណ៍ផ្លូវគោក នៃស្នងការដ្នានគរបាលខេត្តប៉ៃលិន បាននាំយកវត្ថុមធ្យោបាយទាំង២គ្រឿងរក្សាទុកបណ្តោះអាសន្ន រង់ចាំការដោះស្រាយពេលក្រោយ ៕
ប្រភព៖ អគ្គស្នងការដ្ឋាននគរបាលជាតិ
