កណ្តាល ៖ ក្រុមការងារព័តត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមធ្វើការឆ្លើយតបទៅនឹងគណនីហ្វេសប៊ុកឈ្មោះ Oun Na បានបង្ហោះផ្សព្វផ្សាយមានខ្លឹមសារថា ៖ នាងខ្ញុំឈ្មោះ វឺន រីណា ត្រូវបានចោរ ៣នាក់ប្លន់យកម៉ូតូនៅមុខវត្តពោធិព្រឹក្យ កាលពីយប់មិញវេលាម៉ោង៣ភ្លឺ វាបានយកម៉ូតូនាងខ្ញុំអាសង់០១៩ ដែលមានស្លាកលេខកណ្តាល 1A.3068 និងទូរស័ព្ទ OPPO និងប.ស.ស កាតធនាគារ កាតចាក់វ៉ាក់សាំង អត្តសញ្ញាណប័ណ្ណ បងប្អូនណាបានឃើញ រឺក៏រើសបានសុំជូនដំណឹងមកនាងខ្ញុំផង 0966890851 ហើយសុំអោយខាងប៉ូលីសនៅខាងបន្ទាយដែក សុំជួយរកម៉ូតូរបស់នាងខ្ញុំអោយឃើញផង ។
ក្រោយទទួលបានព័ត៌មាននេះភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកអធិការនគរបាលស្រុកកៀនស្វាយ ស្រាវជ្រាវករណីខាងលើជាបន្ទាន់ ។
ផ្អែកតាមលទ្ធផលស្រាវជ្រាវរបស់ប៉ុស្តិ៍នគរបាលរដ្ឋបាលបន្ទាយដែក បានឱ្យដឹងថា ៖
នៅថ្ងៃទី១០ ខែកក្កដា ឆ្នាំ២០២២ វេលាម៉ោង០២ និង៥៥នាទីទៀបភ្លឺ កម្លាំងនគរបាលប៉ុស្តិ៍រដ្ឋបាលបន្ទាយដែក បានទទួលព័ត៌មានពីឈ្មោះ វឿន ឌីណា ភេទស្រី អាយុ២៣ឆ្នាំ ជនជាតិខ្មែរ មានទីលំនៅភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ ខេត្តកណ្តាល មុខរបរ កម្មកររោងចក្រស្រាបៀម៉ាទ្រីត ថា ៖ មានជនមិនស្គាល់មុខចំនួន ០៣នាក់ ភេទប្រុស ជិះម៉ូតូ០២គ្រឿង ម៉ាក Honda ពណ៌ខ្មៅ មិនស្គាល់ស៊េរី មិនស្គាល់ផ្លាកលេខ បានធាក់ម៉ូតូរបស់ខ្លួនឱ្យដួល និងកាប់កែងជើងខាងឆ្វេងបណ្តាល ឱ្យរងរបួសចេញឈាម នៅលើផ្លូវជាតិលេខ១ ចន្លោះគីឡូម៉ែត្រលេខ ៣៣-៣៤ ស្ថិតក្នុងភូមិព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល រួចក៏យកម៉ូតូរបស់ខ្លួនជិះសំដៅឡើងទៅរាជធានីភ្នំពេញ ។ បន្ទាប់ពីទទួលព័ត៌មានបានភ្លាមកម្លាំងប៉ុស្តិ៍នគរបាលរដ្ឋបាលបន្ទាយដែក បានចុះទៅដល់ទីតាំងកើតហេតុខាងលើ ដើម្បីពិនិត្យនិងស្រាវជ្រាវ ពិតជាមានករណីធាក់យកម៉ូតូប្រាកដមែន ក្រោយពីពិនិត្យទីតាំងខាងលើរួច កម្លាំងប៉ុស្តិ៍នគរបាលរដ្ឋបាលបន្ទាយដែក ក៏ទៅជួបសួរនាំជនរងគ្រោះបានឱ្យដឹងថា ៖ នៅថ្ងៃទី០៩ ខែកក្កដា ឆ្នាំ២០២២ វេលាម៉ោង១៨ និង១៥នាទី ជនរងគ្រោះបានជិះម៉ូតូ ០១គ្រឿងខាងលើ ចេញពីផ្ទះម្នាក់ឯងទៅបើកលុយប្តីថ្លៃបើកទ្បានដឹកដីធ្វើផ្លូវ នៅស្រុកមេសាង ខេត្តព្រៃវែង លុះពេលធ្វើដំណើរដល់ស្រុកមេសាង ខេត្តព្រៃវែង មេឃក៏មានភ្លៀងធ្លាក់យ៉ាងខ្លាំងពុំអាចធ្វើដំណើរទៅដល់ការដ្ឋានប្តី ដឹកដីបាន ក៏សុំផ្ទះអ្នកស្រុកជ្រកសិន រង់ចាំភ្លៀងរាំង រហូតដល់ម៉ោង០១ និង៣០នាទីទៀបភ្លឺ ថ្ងៃទី១០ ខែកក្កដា ឆ្នាំ២០២២ ជនរងគ្រោះមិនអាចបើកលុយបានក៏ជិះម៉ូតូត្រទ្បប់មកផ្ទះវិញ ។ លុះធ្វើដំណើរមកដល់ចំណុចរោងចក្រជីផ្កាយប្រាំស្ថិតក្នុងឃុំសំរោងធំ ស្រុកកៀនស្វាយ ខេត្តកណ្តាល ស្រាប់តែមានម៉ូតូ ០២គ្រឿង មិនដឹងជិះចេញកន្លែងណា បានជិះក្បែរម៉ូតូរបស់ជនរងគ្រោះតាមពីក្រោយតែជនរងគ្រោះមិនបានចាប់អារម្មណ៍ ក៏ជិះម៉ូតូរហូតមកដល់ចំណុចកើតហេតុខាងលើ ស្រាប់តែជនមិនស្គាល់អត្តសញ្ញាណម្នាក់ ជិះម៉ូតូ ០១គ្រឿងម៉ាក HONDA ពណ៌ខ្មៅ ធាក់ដៃចង្កូតម៉ូតូជនរងគ្រោះចំហៀងខាងឆ្វេងបណ្តាលឱ្យដួលទៅចិញ្ចើមថ្នល់ ភ្លាមនោះមានម៉ូតូ ០១គ្រឿងទៀត ម៉ាក HONDA ពណ៌ខ្មៅ ជិះគ្នាពីរនាក់ មិនស្គាល់អត្តសញ្ញាណ បានឈប់ម៉ូតូពីក្រោយ រួចជនមិនស្គាល់អត្តសញ្ញាណម្នាក់ បានចុះពីលើម៉ូតូកាន់កាំបិតដើរទៅកាប់កែងជើងខាងឆ្វេងជនរងគ្រោះបណ្តាលឱ្យចេញឈាម រួចក៏លើកយកម៉ូតូជនរងគ្រោះ ជិះទ្បើងទៅភ្នំពេញបាត់ ។
ករណីខាងលើនេះ កម្លាំងផ្នែកជំនាញនគរបាលយុត្តិធម៌ស្រុកកៀនស្វាយ សហការជាមួយកម្លាំងជំនាញពាក់ព័ន្ធ និងកម្លាំងនគរបាលប៉ុស្តិ៍រដ្ឋបាលបន្ទាយដែក កំពុងស្រាវជ្រាវកំណត់អត្តសញ្ញាណជនសង្ស័យយ៉ាងយកចិត្តទុកដាក់ដើម្បីចាត់ការតាមនីតិវិធី ។ អាស្រ័យហេតុនេះ សូមសាធារណជនមេត្តាជ្រាបជាព័ត៌មាន ៕
ប្រភព៖ អគ្គស្នងការដ្ឋាននគរបាលជាតិ
