មណ្ឌលគិរី ៖ បុរសម្នាក់មានសតិមិនគ្រប់ស្រវឹងស្រា បានយកកាំបិតអារ.កខ្លួនឯងនៅក្នុងផ្ទះស្លាប់បាត់បង់ជីវិត ។ ហេតុការណ៍នេះបានកើតឡើងនៅថ្ងៃអង្គារ ៣រោច ខែចេត្រ ឆ្នាំខាល ពុទ្ធសករាជ ២៥៦៥ ត្រូវនឹងថ្ងៃទី១៩ ខែមេសា ឆ្នាំ២០២២ នៅវេលាម៉ោង៧និង៣០នាទី នៅភូមិដើមស្រល់ ឃុំមនោរម្យ ក្រុងសែនមនោរម្យ ។
បន្ទាប់ពីទទួលដំណឹងខាងលើ ដោយមានការដឹកនាំសម្របសម្រួលពីលោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្តមណ្ឌលគិរី កម្លាំងជំនាញការិយាល័យបច្ចេកទេស សហការផ្នែកជំនាញក្រុងសែនមនោរម្យនិងប៉ុស្តិ៍មនោរម្យ និងចូលរួមដោយលោកគ្រូពេទ្យ ក្រុមប្រឹក្សាសង្កាត់ បានធ្វើការពិនិត្យកន្លែងកើតហេតុ និងសាកសព ។
ក្រោយពីបានពិនិត្យយ៉ាងល្អិតល្អន់និងប្រមូលព័ត៌មាន សាក្សីជុំវិញហេតុការណ៍ សមត្ថកិច្ចសន្និដ្ឋានថា សាកសពជនរងគ្រោះឈ្មោះ ឆន ចាន់ ភេទប្រុស អាយុ៣០ឆ្នាំ ជនជាតិខ្មែរ មានទីលំនៅភូមិ-ឃុំកើតហេតុខាងលើពិតជា បានធ្វើអត្តឃាតអារ.ក សម្លាប់ខ្លួនប្រាកដមែន ។ មូលហេតុ ដោយសារជនរងគ្រោះមានសតិមិនប្រក្រតី ក្រោមឥទ្ធិពលស្រវឹងស្រា ។
ក្រោយពិនិត្យចប់សព្វគ្រប់ សមត្ថកិច្ចបានប្រគល់សាកសពជូនក្រុមគ្រួសារធ្វើបុណ្យតាមប្រពៃណី ៕
ប្រភព៖ អគ្គស្នងការដ្ឋាននគរបាលជាតិ
