កណ្តាល៖ ជនសង្ស័យជាប្អូនថ្លៃ ម្នាក់ ត្រូវបាននគរបាលស្រុកកៀនស្វាយឃាត់ខ្លួន ។ បន្ទាប់ពីបានគំរាមសម្លាប់ ដុតផ្ទះ និងដុតឡានបងថ្លៃ ដោយសារតែខឹងនឹងបងថ្លៃ ស៊ីដាច់លុយចំនួន ២០ម៉ឺនរៀល ពីថៅកែការដ្ឋានដឹកដីរបស់ខ្លួន ។
ហេតុការណ៌មួយនេះបានកើតឡើងនៅថ្ងៃទី២៥ ខែមករា ឆ្នាំ២០២២ វេលាម៉ោង២០:២០នាទីយប់ នៅចំណុចភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល។
បើតាមប្រភពសមត្ថកិច្ចបានអោយដឹងថាជនរងគ្រោះមានឈ្មោះ ដាំ ជា ភេទប្រុស អាយុ ៤៦ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្ដាល ។ ដោយឡែកជនសង្ស័យមានឈ្មោះ ឈន ប៊ុនណាក់ ភេទ ប្រុស អាយុ ២៨ឆ្នាំ ជនជាតិខ្មែរ មុខរបរ បើកឡាន មានទីលំនៅ ភូមិព្រែកតានប់២ ឃុំកំពង់ស្វាយ ស្រុកកៀនស្វាយ ខេត្តកណ្តាល។
សមត្ថកិច្ចបានបន្ថែមថានៅមុនពេលកើតហេតុ ជនរងគ្រោះកំពុងតែដេកនៅក្នុងបន្ទប់ផ្ទះរបស់ខ្លួនស្រាប់តែជនសង្ស័យជាប្អូនថ្លៃ បានមកធាក់ទ្វាបន្ទប់ដេករបស់ជនរងគ្រោះហើយស្រែកហៅអោយចេញមកខាងក្រៅ នឹងបានគំរាមគំហែង ជនរងគ្រោះថាបើមិនចេញមកក្រៅទេ និងដុតផ្ទះ វ៉ៃកំទេចឡាន ហើយនឹងសម្លាប់ជនរងគ្រោះចោល។
ក្រោយលឺដូច្នេះជនរងគ្រោះភ័យក៏បានរត់ទៅយកឡានបើកផ្ញើរផ្ទះអ្នកភូមិនៅក្បែរគ្នា នឹងបានទូរស័ព្ទប្រាប់សមត្ថកិច្ចប៉ុស្តិ៍នគរបាលរដ្ឋបាលកំពង់ស្វាយ អោយចុះមកអប់រំណែនាំ ជនសង្ស័យអោយឈប់រករឿងខ្លួនទៀត។
លុះដល់ថ្ងៃទី២៥ ខែមករា ឆ្នាំ២០២២ វេលាម៉ោង២០ :២០នាទីយប់ ជនសង្ស័យដដែរ បានកាន់កាំបិតផ្គាក់ផ្លែដែក ដងឬស្សីរករឿងជនរងគ្រោះដោយបានគំរាមគំហែង រកដុតផ្ទះ វ៉ៃកំទិចឡាន និងរកសំលាប់ជនរងគ្រោះចោលម្ដងទៀត។ ពេលនោះជនរងគ្រោះ បានមកដាក់ពាក្យបណ្តឹងនៅប៉ុស្តិ៍នគលបាលរដ្ឋបាលកំពង់ស្វាយ។ ក្រោយពីទទួលបានពាក្យបណ្តឹងពីជនរងគ្រោះរួចកម្លាំងប៉ុស្តិ៍នគរបាលរដ្ឋបាលកំពង់ស្វាយបានចុះទៅដល់កន្លែងហេតុរួចបាននាំខ្លួនជនសង្ស័យយកមកប៉ុស្តិ៍នគរបាលរដ្ឋបាលកំពង់ស្វាយដើម្បីធ្វើការសាកសួរ។
នៅចំពោះសមត្ថកិច្ចជនសង្ស័យបានឆ្លើយសារភាពថាៈ កាលពីថ្ងៃទី២១ ខែមករា ឆ្នាំ២០២២ ខ្លួនបានតេទូរស័ព្ទទៅឈ្មោះទី សេងចាំង ភេទប្រុស អាយុប្រហែល៤៧ឆ្នាំ ជនជាតិខ្មែរ មុខរបរ ថៅកែការដ្ឋានដឹកដី មានទីលំនៅភូមិព្រែកបាឡាក់ឆឹង ឃុំត្រោយស្លា ស្រុកស្អាង ខេត្តកណ្ដាល ។ ដើម្បីសុំចូលធ្វើការងារវិញ ហើយនឹងសុំខ្ចីប្រាក់ចំនួន ២០០.០០០៛(ម្ភៃមុឺនរៀល) រួចថៅកែការដ្ឋានដឹកដី បានប្រាប់ថា ចាំផ្ញើរតាមឈ្មោះដាំ ជា ភេទប្រុស(ត្រូវជាបងថ្លៃរបស់ខ្ញុំ) ។
លុះដល់ម៉ោង២១ និង៣០នាទីថ្ងៃ ខែ ឆ្នាំដដែរ ខ្លួនស្រវឹងស្រាបានទៅគោះទ្វាផ្ទះជនរងគ្រោះ(បងថ្លៃ)ដើម្បីសួរនាំរឿងលុយដែលខ្លួនបានខ្ចីពីថៅកែដឹកដី ពេលនោះជនរងគ្រោះ(បងថ្លៃ)បានហុចមីកញ្ចប់ពណ៌ខៀវចំនួនប្រាំកញ្ចប់មកអោយ ភ្លាមនោះខ្លួនបាននិយាយគំរាមគំហែងជនរងគ្រោះជាច្រើនតែភ្លេចអស់មិនចាំថាខ្លួនបាននិយាយពាក្យសម្ដីអ្វីខ្លះ។
លុះដល់ថ្ងៃទី២៥ ខែមករា ឆ្នាំ២០២២វេលាម៉ោង២០ និង២០នាទីជនសង្ស័យបានផឹកស្រាថ្នាំស្រវឹងកាន់កាំបិតផ្គាក់ដងឬស្សី ផ្លែដែកស្រែកជេរគំរាមគំហែងរកសំលាប់ និងរកដុតផ្ទះជនរងគ្រោះចោល។ ជនសង្ស័យបានឆ្លើយសារភាពទៀតថាៈមូលដែលខ្លួនធ្វើសកម្មភាពបែបនេះលើជនរងគ្រោះមកពីខ្លួនខឹងជនរងគ្រោះមិនព្រមអោយលុយដែលខ្លួនបានខ្ជីពីថៅកែម្ចាស់ការដ្ឋានដឹកដីរបស់ខ្លួន។ បច្ចុប្បន្នជនដង្ស័យត្រូវបាននគរបាលស្រុកកៀនស្វាយ ចាត់ការតាមនីតិវិធី៕
ប្រភព៖ សហការី
