ភ្នំពេញ៖ កាលពី ព្រឹកថ្ងៃទី១៤ ខែធ្នូ ឆ្នាំ២០២១កន្លងទៅ មានករណីគ្រោះថ្នាក់ចរាចរណ៍មួយក្រោយរថយន្តបែនដឹកដីបើកលឿនទៅបុកជាមួយនឹងរថយន្ត ២គ្រឿង ហើយមិនទាន់អស់ល្បឿនបានរុញផ្ទប់ម៉ូតូអូសរ៉ឺម៉កមួយគ្រឿងគរលើគ្នាបណ្តាលឱ្យបុរសម្នាក់របួសធ្ងន់ នៅតាមផ្លូវហាណូយក្បែរវត្តឃ្មួញ សង្កាត់ឃ្មួញ ខណ្ឌសែនសុខ។
បើតាមប្រភពពីនគរបាលបានឱ្យដឹងថា រថយន្តបង្កប្រភេទបែនដឹកដីផ្លាកលេខ ភ្នំពេញ 3D-1660 បើកលឿន ពីត្បូងទៅជើងដោយហ្វ្រាំងមិនស៊ីក៏ជ្រុលបុកពីក្រោយរថយន្តម៉ាកស្តារិចឃ្លុបហើយរុញទៅបុកនឹង រ៉ឺម៉កម៉ូតូ រួចរុញបន្តផ្ទប់នឹងរថយន្តម៉ាកនីសាន់ដែលកំពុងថយក្រោយបណ្តាលឱ្យអ្នកបើកម៉ូតូកង់បីរងរបួសធ្ងន់ ។ ក្រោយមកសមត្ថកិច្ចចុះទៅអន្តរាគមន៍ យកមធ្យោបាយទាំងអស់ទៅរក្សាទុក រង់ចាំដោះស្រាយនៅពេលក្រោយ ៕
ប្រភព៖ សហការី
