ភ្នំពេញ៖ កាលពីម៉ោងប្រមាណ ៨យប់ថ្ងៃទី១៧ ខែវិច្ឆិកា ឆ្នាំ២០២១ម្សិលមិញនេះ មានករណីប្រជាការពារ ២នាក់ ទាស់សម្តីគ្នារហូតបង្កជាហិង្សា នៅក្នុងបរិវេណសាលាសង្កាត់បឹងទំពន់ទី២ បណ្តាលអោយភាគីម្ខាងស្លាប់ពេលបញ្ជូនទៅដល់មន្ទីរពេទ្យ។ ហេតុការណ៍កើតឡើងនៅចំណុច សាលាសង្កាត់បឹងទំពន់ទី២ ស្ថិតក្នុងសង្កាត់បឹងទំពន់ទី២ ខណ្ឌមានជ័យ រាជ ធានីភ្នំពេញ។
បើតាមប្រភពពីសមត្ថកិច្ចបានអោយដឹងថា ជនរងគ្រោះមានឈ្មោះ អេម វន ភេទប្រុស អាយុ ៧១ឆ្នាំ មានទីលំនៅផ្ទះលេខ ២១៨ ស្ថិតតាមបណ្តោយផ្លូវលេខ ៣៧១ ក្នុងភូមិព្រែកតាគង់ ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ចំណែកជនសង្ស័យមានឈ្មោះហេង សារ៉េត ភេទប្រុស អាយុ ៦២ឆ្នាំ មានទីលំនៅផ្ទះលេខ ២០៤ តាមបណ្តោយផ្លូវ ៣៧១ ក្នុងភូមិក្បាលទំនប់ ២ សង្កាត់បឹងទំពន់ ២ ខណ្ឌមានជ័យ រាជធានីភ្នំពេញ។
ប្រភពដដែរបានបន្តថា ជនសង្ស័យបានជិះម៉ូតូម៉ាកហុងដាឌ្រីម ពណ៌ខ្មៅ ស្លាកលេខភ្នំពេញ 1C-9544 ក្នុងសភាពស្រវឹង ក៏បាននិយាយជាមួយជនរងគ្រោះ រហូសទាស់សម្តីគ្នា នឹងបានច្រានជនរងគ្រោះដួលជាច្រើនដង បណ្តាលអោយសន្លប់។ ក្រោយហេតុការនេះក្រុមគ្រួសារជនរងគ្រោះក៏បានបញ្ជូនជនរងគ្រោះទៅមន្ទីរពេទ្យរុស្សី ប៉ុន្តែដោយស្ថានភាពធ្ងន់ធ្ងន់ខ្លាំងពេល មិនយូរប៉ុន្មានក៏បានស្លាប់។
ដោយឡែកជនសង្ស័យត្រូវបានសមត្ថកិច្ចឃាត់ខ្លួន ដើម្បីបន្តនីតិវិធីច្បាប់ បន្ទាប់ពីសាច់ញាតិជនរងគ្រោះ បានដាក់ពាក្យបណ្តឹង៕
