កណ្ដាល៖ មុខ”សញ្ញាកាច់ក” ម៉ូតូម្នាក់ត្រូវបានសមត្ថកិច្ចប៉ូលិស ស្រុកខ្សាច់កណ្ដាលសហការជាមួយកម្លាំង ប៉ុស្តិ៍នគរបាលឃុំស៊ីធរ ដេញស្ទាក់ចាប់ខ្លួនបាន រួមនិងម៉ូតូរបស់ជនរងគ្រោះ១គ្រឿង។ នេះបើយោងតាមប្រភពលោក ធឿន វណ្ណា នាយរងប៉ុស្តិ៍នគរបាលឃុំស៊ីធរ បានអោយដឹងថាករណីចាប់ខ្លួនមុខសញ្ញា”ចោរកាច់ក”នេះ បានធ្វើឡើងនៅលើផ្លូវជាតិលេខ៨ ភូមិព្រៃបាំង ឃុំស៊ីធរ ស្រុកខ្សាច់កណ្ដាល ខេត្តកណ្ដាល កាលពីវេលាម៉ោង១១ថ្ងៃត្រង់ នាថ្ងៃទី១៤ ខែវិច្ឆិកា ឆ្នាំ២០២១។
លោកបានបន្ថែមទៀតថាជនសង្ស័យមានឈ្មោះ សៅ សុភ័ក្រ ភេទប្រុស អាយុ ៣២ឆ្នាំ នៅភូមិព្រែកតារ័ត្ន ឃុំកំពង់ប្រាំង ស្រុកពារាំង ខេត្តព្រៃវែង។ មុននឹងឈានដល់មានការឃាត់ខ្លួននេះ កាលពីព្រឹកទី១៤ ខែវិច្ឆិកា ឆ្នាំ២០២១ ជនសង្ស័យបានធ្វើសកម្មភាព លួចម៉ូតូម៉ាក Scoopy ពណ៌ស ១គ្រឿង ពាក់ស្លាកលេខភ្នំពេញ 1IS-7125 នៅចំណុចឃុំព្រែកតាកូវ ស្រុកខ្សាច់កណ្ដាល ខេត្តកណ្ដាល ដែលជារបស់ឈ្មោះ ជា សម្ផស្ស ភេទស្រី អាយុ ៤៥ឆ្នាំ។
ក្រោយលួចបានហើយ ជនសង្ស័យបានបើកម៉ូតូយ៉ាងលឿន កាត់តាមផ្លូវ 7NG ឆ្ពោះមកឡើងផ្លូវជាតិលេខ៨ បំណង ឆ្លងទៅស្រុកពារាំង ខេត្តព្រៃវែង ។ ខណៈនោះសមត្ថកិច្ចនគរបាលស្រុកខ្សាច់កណ្ដាល បានសហការជាមួយកម្លាំងប៉ុស្តិ៍រដ្ឋបាលស៊ីធរ តាមដេញស្ទាក់រហូតឃាត់ខ្លួនបានត្រង់ចំណុចខាងលើតែម្ដងទៅ។ បច្ចុប្បន្នជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនទៅចាត់ការតាមនីតិវិធី៕
ប្រភព៖ សហការី
