កំពត៖ មានមនុស្សចំនួន០៧នាក់ (កុមារ ៣នាក់) បានស្លាប់ក្នុងករណីគ្រោះថ្នាក់ចរាចរណ៍ក្រឡាប់រថយន្ត ចូលប្រឡាយទឹក នៅលើកំណាត់ផ្លូវជាតិលេខ៣ (កំពត-ភ្នំពេញ) ដែលស្ថិតនៅភូមិល្អាង ឃុំល្អាង ស្រុកដងទង់ ខេត្តកំពត ដោយសារបើកបរក្នុងល្បឿនលឿន ហើយបែកកង់ (កង់កក្រោយ)។
នេះបើយោងតាមការបញ្ជាក់របស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានឱ្យដឹងថា ករណីខាងលើកើតឡើង កាលពីវេលា ម៉ោង ២:៤៥នាទី រសៀល ថ្ងៃទី២ ខែតុលា ឆ្នាំ២០២១ ដោយរថយន្តមួយគ្រឿងម៉ាក កាម៉ារីឆ្លាម ស្លាកលេខ តាកែវ 2A-1452 បានបែកកង់ក្រឡាប់ធ្លាក់ចូលប្រឡាយ បណ្តាលឱ្យមនុស្សប្រុសស្រី រួមទាំងកុមារសរុបចំនួន ៧នាក់ បានស្លាប់បាត់បង់ជីវិត។
ក្នុងចំណោមជនរងគ្រោះទាំង ៧នាក់ មានប្រុស៣ ស្រី៤នាក់ ក្នុងនោះ ៥នាក់ រស់នៅភូមិត្រពាំងវែង ឃុំត្រពាំងរាំង ស្រុកជុំគិរី ដែលមានឈ្មោះ៖
១. ឈ្មោះ ស្រេ ចិន្តា ភេទប្រុស អាយុ ៣៤ឆ្នាំ(ប្តី) ។
២. ឈ្មោះ វ៉ាន់ សូរិយា ភេទស្រី អាយុ៣២ឆ្នាំ (ប្រពន្ធ) ។
៣. ឈ្មោះ វ៉ាន់ ណារិទ្ធ ភេទប្រុស អាយុ១០ឆ្នាំ។
៤. ឈ្មោះ ស្រេ ចាន់ដារ៉ា ភេទប្រុស អាយុ៨ឆ្នាំ ។
៥. ឈ្មោះ ស្រេ សុវ៉ាន់លីតា ភេទស្រី អាយុ២ឆ្នាំ។
ដោយឡែកជនរងគ្រោះពីរនាក់ទៀត រស់នៅឯខេត្តកំពង់ចាម។
យោងតាមការបញ្ជាក់ពីប្រជាពលរដ្ឋរស់នៅតំបន់នោះ បានឱ្យដឹងថា មុនពេលកើតហេតុគេឃើញរថយន្តរងគ្រោះធ្វើដំណើរក្នុងទិសដៅពីកើតទៅលិច ដោយបើកបរក្នុងល្បឿនលឿន ។ លុះមកដល់កន្លែងកើតហេតុ បានបែកកង់បណ្តាលឱ្យក្រឡាប់ធ្លាក់ចូលក្នុងប្រឡាយទឹក។ ចំណែកសពជនរងគ្រោះទាំង៧នាក់ត្រូវបានបញ្ជូនទៅតម្កល់ និងធ្វើបុណ្យតាមប្រពៃណីនៅស្រុកជុំគិរី៕
ប្រភព៖ សហការី
