ហ្វេសប៊ុក៖ នេះបើយោងតាមហ្វេសប៊ុកបុរសម្នាក់ដែលមានឈ្មោះថា Phalla Phorn បានធ្វើការបង្ហោះនិយាយរៀបរាប់អំពីបទពិសោធន៍ពិតៗរបស់លោកខណៈត្រូវបានបញ្ចូនទៅព្យាបាលជំងឺកូវីដ១៩ ក្នុងបន្ទប់សង្គ្រោះបន្ទាន់។
បុរសខាងលើបានសរសេររៀបរាប់នៅហេតុការណ៍ដែលលោកបានឆ្លងកាត់ថា “វាជាការដាស់តឿនរបស់ខ្ញុំ៖ បងប្អូនភាគច្រើនបានដឹងហើយថា ខ្ញុំស្ទើតែបាត់បង់អាយុជីវិតដោយសារជំងឺកូវីដ១៩ កាលពីពេលកន្លងទៅថ្មីៗនេះ។ ខ្ញុំត្រូវបានដឹកតាមឡានពេទ្យ ដើម្បីយកទៅង្គ្រោះបន្ទាន់នៅមជ្ឈមណ្ឌលព្យាបាលកូវីដ។ ខ្ញុំត្រូវបានក្រុមគ្រូពេទ្យបញ្ជូនចូលក្នុងសាលសង្គ្រោះបន្ទាន់ជាមួយនឹងអ្នកជំងឺកូវីដ១៩ កំរិតធ្ងន់ធ្ងរ រាប់រយនាក់ដទៃទៀត។ គ្រាន់តែរុញចូលដល់ក្នុងសាលសង្គ្រោះបន្ទាន់ភ្លាម ខ្ញុំបានលឺសម្រែកយ៉ាងឈឺចាប់បំផុតរបស់អ្នកជំងឺជាច្រើននាក់ ស្រែកឲ្យក្រុមគ្រូពេទ្យជួយ ជាមួយនឹងសាកសពខ្លះ ដែលទើបស្លាប់ថ្មីៗ ក្រោយពេលក្រុមការងាររបស់គ្រូពេទ្យ កំពុងតែញាប់ជើងញាប់ដៃ រុំវិចសាកសពទាំងនោះ។ មានអ្នកស្លាប់នៅគ្រែពីចំហៀងខ្ញុំ គ្រែចុងជើងខ្ញុំ គ្រែលើក្បាលខ្ញុំ និងគ្រែដែលនៅឆ្ងាយពីខ្ញុំ ដែលធ្វើឲ្យខ្ញុំមានអារម្មណ៍តក់ស្លុត និងកំពុងតែរងចាំសេចក្តីស្លាប់ជាបន្តបន្ទាប់ដូចពួកគាត់ដែរ។ អារម្មណ៍ភ័យព្រួយរបស់ខ្ញុំ រាងកាយដែលងើបលែងរួចរបស់ខ្ញុំ ជាមួយនឹងចង្វាក់ដង្ហើមញាប់ៗ ហើយពិបាកដកដង្ហើមដែលអបដោយឧបករណ៍ជំនួយឧកស៊ីស៊ែននោះ រឹតតែធ្វើឲ្យខ្ញុំដឹងខ្លួនជាមុនថា មិនយូរទៀតទេ ខ្ញុំនឹងត្រូវស្លាប់ហើយ ។
ជាការដាស់តឿនរបស់ខ្ញុំដល់បងប្អូន ព្រះបានទុកអាយុជីវិតរបស់ខ្ញុំ តាមរយៈការសង្គ្រោះរបស់ក្រុមគ្រូពេទ្យ ដើម្បីឲ្យខ្ញុំអាចជម្រាបប្រាប់បងប្អូនអំពីជីវិតដ៏ផុយស្រួយ នៃការរីករាលដាលដោយមេរោគកូវីដ១៩នេះ ដែលមានការបាត់បង់អាយុជីវិតចាស់ៗជាបន្តបន្ទាប់ ហើយជារៀងរាល់ថ្ងៃផងដែរ ។ ខ្ញុំជាអ្នកដែលបានឆ្លងកាត់ដោយផ្ទាល់ នៅក្នុងសាលមច្ចុរាជ ដែលមានមនុស្សស្លាប់ជាបន្តបន្ទាប់នោះ ខ្ញុំសូមធ្វើការព្រមាន ក៏ដូចជាដាស់តឿនបងប្អូន ថា៖ បងប្អូនអាចក្លាយទៅជាភ្នាក់ងារចម្លងមេរោគកូវីដ១៩នេះ ទៅដល់ឪពុកម្តាយ យាយតា និងបងប្អូនក្នុងសហគមន៍របស់បងប្អូនជាក់ជាមិនខាន បើបងប្អូននៅតែដើរមិនគិត ជួបជុំគ្នាមិនគិត និងចេញក្រៅមិនគិត ។ បងប្អូននឹងក្លាយទៅជាឃាតករដោយមិនដឹងខ្លួន។ អ្វីដែលខ្ញុំបានចែករំលែកនេះ មិនមែនជាការស្តីបន្ទោស ឬដាក់សំពាតទៅលើបងប្អូនទេ តែខ្ញុំស្រឡាញ់ បារម្ភ និងមិនចង់ឲ្យបាត់បង់អាយុជីវិតរបស់បងប្អូន ក្រុមគ្រួសាររបស់បងប្អូនបន្តទៅទៀតនោះទេ ។ រឿងបុណ្យទាន រឿងជួបជុំ ខ្ញុំពិតជាអាចយល់បានតែអាយុជីវិតរបស់គ្រប់គ្នា គឺរឹតតែសំខាន់ណាស់”៕
