ភ្នំពេញ៖ មានហេតុការណ៍ដ៏គួរឲ្យ ភ្ញាក់ផ្អើលមួយបានកើតឡើង គឺប្ដីប្រពន្ធ ២នាក់ ត្រូវបុគ្គល១ក្រុមមានគ្នា ៥-៦នាក់ យកថ្នាំញៀនមកទម្លាក់ឲ្យ និងបង្ខំឲ្យយកលុយ ៦០០ដុល្លារ មកឲ្យពួកគេ ដើម្បីជាថ្នូរនិងការដោះលែង ។ ហេតុការណ៍នេះ បានកើតឡើងកាលពីម៉ោងជាង ១២រំលងអាធ្រាត្រឈានចូលថ្ងៃទី២៦ ខែសីហា ឆ្នាំ២០២១ ស្ថិតនៅផ្ទះជួល ជាប់ផ្លូវវេងស្រេង ក្នុងភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ ។
ជនរងគ្រោះជាប្ដីមានឈ្មោះ ដេត កុសល អាយុ៣០ឆ្នាំ មុខរបរកម្មកររោងចក្រ ស្នាក់នៅផ្ទះកើតហេតុ ។
បើតាមបុរសរងគ្រោះ បានរៀបរាប់ថា រឿងហេតុនោះគឺនៅយប់ថ្ងៃកើតហេតុ រូបគាត់និងប្រពន្ធ បាននៅក្នុងបន្ទប់ជួលកន្លែង កើតហេតុខាងលើ ហើយរៀបនឹងសម្រាកទៅហើយ ក៏ស្រាប់តែមានបុគ្គលម្នាក់មកគោះទ្វារ ហើយប្រាប់ថា ខ្លួនគេជាអាវុធហត្ថ។ បន្ទាប់មកក៏មានបក្ខពួក ៥ទៅ៦នាក់ទៀត បានចូលមកក្នុងបន្ទប់គាត់ រួចទម្លាក់គ្រឿងញៀន ១កញ្ចប់តូច មកឲ្យគាត់ និងធ្វើសកម្មភាពចាប់វាយខ្នោះគាត់ព្រមទាំងថតរូបគាត់ជាប់ ជាមួយគ្រឿងញៀនថែមទៀតផង ។
ប្រភពដដែលបន្តថា ក្រោយពីចាប់វាយខ្នោះរូបគាត់ហើយ ពួកទាំងនោះបានឲ្យរូបគាត់ និងប្រពន្ធយកលុយ ៥០០ដុល្លារ ដើម្បីជាថ្នូរសម្រាប់ដោះលែង តែគាត់មិនមានលុយ ក៏ពួកគេនោះបង្ខំឲ្យគាត់យកម៉ូតូមួយគ្រឿង ទៅបញ្ចាំនៅឃ្លាំងរំសេវបានប្រាក់ ៥៥០ដុល្លារមកឲ្យ ។ ដោយពួកគេមិនអស់ចិត្ត ក៏ឱ្យរូបគាត់ទៅយក ១០០$ទៀត និងគំរាមឲ្យរើអីវ៉ាន់ចេញពី ផ្ទះជួលទាំងយប់ដើម្បី កុំឲ្យមានរឿងវែងឆ្ងាយ ។ លុះព្រឹកឡើងថ្ងៃទី២៦ ខែសីហា ឆ្នាំ២០២១ ប្ដីប្រពន្ធទាំង ២នាក់ ខាងលើកើតទុក្ខមិនសុខចិត្ត និងនឹកគិតថាខ្លួនទទួលភាព អយុត្តិធម៌ខ្លាំងពេក ក៏សម្រេចចិត្តឲ្យសមត្ថកិច្ចមូលដ្ឋាន ប៉ុស្ដិ៍នគរបាលរដ្ឋបាលស្ទឹងមានជ័យទី៣ ជួយដោះស្រាយនិងរកយុត្តិធម៌ឲ្យវិញ ។
ក្រោយពីទទួលបានព័ត៌មាននេះភ្លាម លោកវរសេនីយ៍ត្រី ឯម ភារី នាយប៉ុស្ដិ៍នគរបាលស្ទឹងមានជ័យទី៣ បានចាត់ឱ្យលោក នូ កាន់លី នាយរងប៉ុស្ដិ៍ស្ទឹងមានជ័យទី៣ ដឹកនាំកម្លាំងចុះទៅសួរនាំ និងឱ្យជនរងគ្រោះទៅដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាល ស្ទឹងមានជ័យទី៣ ដើម្បីធ្វើការស្រាវជ្រាវ ដោះស្រាយតាមជំនាញ ។ តែក្នុងពេលនោះដែរ ស្រាប់តែមានបុគ្គលផ្សេង ដែលមិនបញ្ចេញមុខបានអះអាងថា នឹងមានគេយកលុយគ្រប់ចំនួន និងការប្រាក់មកឲ្យប្ដីប្រពន្ធ ជនរងគ្រោះវិញដើម្បីបញ្ចប់រឿង ៕
