ភ្នំពេញ៖ នៅវេលាម៉ោង ០១ និង១០ នាទី រំលងអាធ្រាត្រ ថ្ងៃពុធ ៤រោច ខែទុតិយាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី ២៨ ខែកក្ដដា ឆ្នាំ២០២១ មានករណីអគ្គីភ័យមួយកន្លែង បានកើតឡើងនៅផ្ទះលេខ ៤៨ ផ្លូវ ២៨៩ សង្កាត់បឹងកក់ទី ២ ខណ្ឌទួលគោក រាជធានីភ្នំពេញ ។
យោងតាមការរៀបរាប់របស់លោក សុីន ថតថារ័ត្ន ភេទប្រុស អាយុ២៨ឆ្នាំ ជាម្ចាស់ហាង បានឲ្យដឹងមូលហេតុអគ្គីភ័យ បង្កឲ្យមានភាពភ្ញាក់ផ្អើលនោះ បណ្តាលមកពីឆ្លងចរន្តអគ្គិសនីពី ទូរអេធីអឹម(ATM) ។
ករណីអគ្គិភ័យខាងលើធ្វើឱ្យខូចខាតទូរអេធីអឹម(ATM) ទាំងស្រុង ឆេះផ្លាកឈ្មោះហាងចំនួន ២ (ហាង PEZZO និងហាង Peaeh Tea ប្រហែល៥០% ) នឹងពុំបណ្ដាលអោយឆេះរាលដាល ដល់ផ្ទះអ្នកជិតខាងនោះទេ ហើយក៏គ្មានអ្នក របួសនិងស្លាប់ផងដែរ ។
ក្រោយពីកើតហេតុ រថយន្តការិយាល័យអគ្គិភ័យ បានមកដល់ចំនួន៦គ្រឿង ហើយប្រេីប្រាស់ទឹកអស់ចំនួន៣រថយន្ត ស្មើនឹង១២ម៉ែត្រគូប ចំពោះអគ្គីភ័យនេះ ត្រូវគ្រប់គ្រងបាន ១០០% នៅវេលាម៉ោង១និង៥០នាទី រំលងអាធ្រាត្រនាថ្ងៃខែឆ្នាំដដែល ៕
