ភ្នំពេញ៖ កម្លាំងកងរាជអាវុធហត្ថស្រុកពាមរក៏ កាលពីថ្ងៃទី ០៨ ខែមិថុនាឆ្នាំ ២០២១ ដឹកនាំដោយលោកវរសេនីយ៍ត្រី ឈួន ឬទ្ធីមេបញ្ជាការស្រុក សហការជាមួយគយសាខាខេត្តព្រៃវែងនៅចំណុចភូមិ ២ ឃុំព្រែកខ្សាយ(ខ) លើផ្លូវជាតិលេខ១ បានឃាត់រថយន្តមួយគ្រឿង ម៉ាកសាំយុងពណ៌ទឹកប៊ិច ស្លាកលេខ ភ្នំពេញ២AK៣០៥៧ បើកបរដោយឈ្មោះ ខែម ទី ភេទប្រុស អាយុ៣៩ ឆ្នាំ រស់នៅភូមិអង្គក្តួច ឃុំព្រៃគគីរ ស្រុកចន្ទ្រា ខេត្តស្វាយរៀង ដែលបានដឹកឥវ៉ាន់គ្មានពន្ធនាំចូលខុសច្បាប់ ហើយត្រូវសមត្ថកិច្ចត្រួតពិនិត្យស្ទាក់ចាប់បាន។
ក្នុងការឆែកឆែរសមត្ថកិច្ចរកឃើញទូរសព្ទទំនើបម៉ាក iPhone រាប់ពាន់គ្រឿងមានដូចជា៖
១. ទូរសព្ទដៃ iphone 12(promax)ចំនួន៧៦៨ គ្រឿង
២. ទូរសព្ទដៃ iphone 12 ចំនួន ៩៤ គ្រឿង
៣. ទូរសព្ទដៃ iphone 11(promax)ចំនួន៦៨៤គ្រឿង
៤. ទូរសព្ទដៃ iphone 11 ចំនួន ១៥៥៥គ្រឿង
៥. ទូរសព្ទដៃ iphone(xsmax)ចំនួន ៧៣៨គ្រឿង
៦. ទូរសព្ទដៃ iphone 7(plus)ចំនួន ៦៧៩គ្រឿង
៧. ទូរសព្ទដៃ iphone 7 ចំនួន ១៦២ គ្រឿង
បច្ចុប្បន្ន វត្ថុតាងដែលសមត្ថកិច្ចចាប់បាន ត្រូវបានប្រគល់ជូនគយសាខាខេត្តព្រៃវែង ដើម្បីចាត់ការបន្ត ៕
