ភ្នំពេញ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបន្តអំពាវនាវឲ្យកងទ័ព សិស្សនិស្សិត ដែលកំពុងបំពេញបេសកកម្មរក្សាសន្តិភាព និងសិក្សានៅតាមបណ្ដាប្រទេសនានា បង្កើនការប្រុងប្រយ័ត្ន ចំពោះជំងឺកាចសាហាវកូវីដ១៩ ដោយអនុវត្តវិធានការ “៣ការពារ ៣កុំ” ឱ្យបានខ្ជាប់ខ្ជួន ។
តាមរយៈបណ្ដាញសង្គមហ្វេសប៊ុក នៅព្រឹកថ្ងៃទី២៥ ឧសភានេះ សម្ដេច ទៀ បាញ់ បានបញ្ជាក់យ៉ាងដូច្នេះថា «អត្រាចម្លងនៃមេរោគ កូវីត-១៩ នៅតែបន្តកើនឡើងជារៀងរាល់ថ្ងៃ នៅតាមបណ្តាប្រទេសនានា នៅលើពិភពលោក ដូចនេះសូមក្មួយៗ កងទ័ព សិស្ស និស្សិតដែលកំពុងបំពេញបេសកកម្មរក្សាសន្តិភាព និងសិក្សានៅតាមបណ្ដាប្រទេសនានា ត្រូវប្រុងប្រយ័ត្ន និងថែទាំសុខភាព អនាម័យឱ្យបានល្អ ព្រមទាំងអនុវត្តនូវវិធានការការពារ “៣ការពារ ៣កុំ” ឱ្យបានខ្ជាប់ខ្ជួន» ។
